Papa në audiencën e përgjithshme: përvujtëria e Krishtit Fëmijë dhe e Marisë fitojnë
mbi të gjitha pushtetet e botës.
E vërteta e Krishtlindjes është: “Pushteti i pambrojtur i një Ferishteje, fiton mbi
zhurmën e pushteteve të botës”. Me këto fjalë Benedikti XVI e përfundoi sot paradite,
audiencën e 43-të e të fundit të përgjithshme të vitit 2012, mbajtur në Sallën e Palit
VI, në Vatikan. Katekizmin ia kushtoi reflektimit për fenë e Marisë gjatë gjithë jetës
së saj. Ungjilli nis me një përshëndetje: “Gëzohu, o Hirplote!”. Përshëndetja fton
të gëzohesh! Do të mjaftonte kjo, për të përshkruar gëzimin, që buron nga feja e krishterë.
Benedikti XVI e hapi meditimin e tij kushtuar fesë së Marisë, duke u rikthyer në Nazaret,
në atë ditë kur fjalët e një Engjëlli kumtuan se historia njerëzore ishte në pritje
të ndryshimit, të kohës së re: “Përshëndetja e Engjëllit Marisë, është ftesë
për gëzim, për gëzim të thellë; kumton, kështu, përfundimin e trishtimit në botë,
përballë grahmave, vuajtjes, vdekjes, ligësisë, errësirës të së keqes, që duket sikur
e nxin dritën e mirësisë hyjnore. Është përshëndetja me të cilën nis Ungjilli, Lajmi
i Mirë”. Përgjigjja, që i jep Maria lajmëtarit qiellor, dihet: bindje,
nënshtrim krejtësisht i lirë ndaj Fjalës së kumtuar. Gëzimi, që kujton Engjëlli, pohon
Papa, buron nga hiri, nga lidhja jetike me Hyjin. Megjithatë, shton Ati i Shenjtë: “Hapja
e shpirtit Hyjit dhe veprimit të tij në fe, përfshin edhe elementin e errësirës. Por
pikërisht njeriu që, si Maria, ia hap shpirt e zemër Zotit, arrin ta pranojë vullnetin
hyjnor, edhe kur është misterioz, edhe kur nuk përkon me vullnetin tonë. Ashtu si
Maria, Feja e së cilës jeton gëzimin e Lajmërimit, por kalon edhe përmes errësirës
së kryqëzimit të Birit, për të arritur, më në fund, në dritën e Ringjalljes”. Benedikti
XVI kujtoi paralelizmin ndërmjet ngjarjes, që jetoi Maria, e asaj, që jetoi Abrahami.
Edhe Patriarku i besoi plotësisht, pa asnjë lëkundje, Engjëllit të Zotit, që i kërkoi
të flijonte të birin, Isakun. E kjo, vërejti Benedikti XVI, u jep të krishterëve një
mësim të çmuar: u tregon ç’do të thotë të besosh, edhe atëherë kur Hyji nuk duket,
kur mungon në jetën e njeriut: “Por sa më shumë t’ia hapim shpirtin
Zotit, sa më shumë ta pranojmë dhuratën e fesë, sa më shumë ta mbështesim gjithë besimin
në Të - ashtu si Abrahami e si Maria - aq më shumë Ai, me praninë e tij, na bën të
aftë ta jetojmë çdo situatë të jetës në paqe, plotësisht të sigurtë për besnikërinë
e dashurinë e Tij. E kjo do të thotë të dalësh nga vetja e nga planet tua, për të
hyrë në planet e Zotit, fjala e të cilit duhet të jetë dritë për mendimet e veprimet
tona”. Benedikti XVI u ndalua, më pas, tek episodi ungjillor, në të cilin
tregohet sesi Maria e Jozefi e gjetën Jezusin dymbëdhjetë vjeçar në Tempull. Pikërisht
në këtë çast Maria, me fe të gjallë, pranon se Ati i vërtetë i Jezusit zë vendin e
parë, mbi gjithçka. Jemi përballë një çasti të dhimbshëm ndarjeje, që do të prekte
kulmin mbi Kalvar. Por, pavarësisht, feja e Virgjërës mbetet e patundur. Pse? - pyet
Papa. Përgjigjen e gjejmë në vetë fjalët e Marisë, menjëherë pas kumtimit qiellor:
“Në çastin e lajmërimit, Ajo turbullohet duke dëgjuar fjalët e Engjëllit.
Është ndrojtja, që provohet nga prekja prej afërsisë së Zotit, e jo sjellja e njeriut,
që ka frikë përballë kërkesës së Tij. Maria nuk shtanget para ngjarjes, me ndikim
të jashtëzakonshëm mbi jetën e saj. Ajo di të shikojë në thellësi, t’i shqyrtojë mirë
ngjarjet, t’i bluajë, t’i dallojë, duke fituar, kështu, kuptimin, që mund ta japë
vetëm feja. Është përvujtëri e thellë, nënshtrimi i Marisë. Ajo e mirëpret në vetvete
edhe atë veprim të Zotit, të cilin nuk e kupton, duke e lënë Hyjin t’ia hapë mendje
e zemër”. Pikërisht këtë përvujtëri e këtë bindje në fe, u uroi Benedikti
XVI të gjithë besimtarëve për Krishtlindje: “Lavdia e Hyjit nuk shfaqet
në triumfin e në pushtetin e një mbreti, nuk shkëlqen në një qytet të famshëm, në
një pallat plot salltanet, por nis e banon në kraharorin e një virgjëre, dëftohet
në varfërinë e një fëmije. Gjithëpushteti i Hyjit, edhe në jetën tonë, vepron me forcën,
shpesh krejt të heshtur, të vërtetësisë e të dashurisë. Atëherë feja na thotë se pushteti
i pambrojtur i këtij Fëmije, në fund të fundit, fiton mbi poterën e pushteteve të
botës”.Në përfundim të katekizmit në gjuhë të tjera, Benedikti XVI përshëndeti
grupin e meshtarëve të rinj Legjionarë të Krishtit, të pranishëm në Sallën e Palit
VI si dhe gajdexhinjtë molisanë të Matezes, ardhur nga Boiano, të shoqëruar nga kryeipeshkvi
i Kampobasos, Xhankarlo Bregantini. Me tingujt e gajdeve të tyre, gajdexhinjtë krijuan
në sallë, si zakonisht në këtë kohë festive, atmosferën e traditave të lashta të
Krishtlindjes, që shijohet aq shumë përmes këngëve, ardhur nga kohë që nuk mbahen
mend.