Feja ka çaste drite, por edhe errësire. Lëre Fjalën e Zotit të të prijë!
Në përfundim të audiencës së përgjithshme, në rrjet u dukën dy tweet-e të tjera të
Benediktit XVI. Në të parin, Papa pohon se feja e secilit ka çaste drite, por edhe
errësire. Në se dëshiron të ecësh gjithnjë në dritë, fton, lëre Fjalën e Zotit të
të prijë! Në tweet-in e dytë të sotëm, Benedikti XVI nënvizon: “Maria e jeton
gjithë gëzim lajmin se do të bëhet Nënë e Jezusit, Birit të mishëruar të Hyjit. Gëzimi
i vërtetë, është komenti i Atit të Shenjtë, vjen në bashkim me Hyjin”. Ky është
tweet-i i gjashtë i Papës, që nga e mërkura e kaluar. Në 8 gjuhët e faqes së internetit
me emrin “@pontifex” Benedikti XVI deri tani ka tërhequr më se 2 milionë e 70 mijë
follower, domethënë, njerëz që e ndjekin këtë mënyrë krejt të re, tejet moderne, komunikimi
të Atit të Shenjtë. Në gjuhën angleze, ndjekësit e kalojnë numrin 1 milion e 200 mijë;
në gjuhën spanjolle, janë 465 mijë; në italisht, 200 mijë. Besojmë se nuk mungojnë
edhe shumë follower shqiptarë, që e ndjekin Papën në njërën nga 8 gjuhët, në kushtet
e reja, kur gjuhët e huaja janë bërë pronë e të gjithë qytetarëve shqiptarë, në lidhje
të ngushtë me mbarë botën. Por ndonjë cicërimë, si kjo e sotmja, mund ta ndjekin edhe
shqip, në faqen tonë të internetit.Duke folur në mikrofonin e Radios së Papës, Kiara
Amirante, themeluese e Bashkësisë ‘Horizonte të Reja’, i ftoi katolikët ta shoqërojnë
Benediktin XVI gjatë misionit të tij në kontinentin dixhital. Ne, të krishterët,
pohoi, kemi shumë mungesa të paarsyeshme në network, ndërsa profetët e mashtrimit
janë jashtëzakonisht të pranishëm, madje edhe agresivë. Prandaj, përfundon Kiara Amirante,
duhet të na dëgjohet zëri e ta kumtojmë me gjithë zemër Lajmin e Mirë, edhe në web.