Бэнэдыкт XVI папрасіў спартсменаў не ўжываць допінг
Бэнэдыкт XVI сустрэўся
17 снежня з італьянскімі медалістамі апошніх Алімпійскіх гульняў у Лондане, на якіх
каманда Італіі заваявала 28 медалёў, у тым ліку 8 залатых. Святы Айцец падкрэсліў,
што Алімпіяда, гэта праверка не толькі тэхнічнай падрыхтаванасці спартсменаў, але
перш за ўсё чалавечых якасцяў. Кожны від спорту, нагадаў Папа, звязаны са справядлівай
барацьбой, “пачуццямі салідарнасці і альтруізму, а таму радасці, задавальнення і свята”.
Спорт, паводле Пантыфіка, прадугледжвае сапраўднае чалавечае развіццё, самаадрачэнне,
зацятасць, цярпенне і, перш за ўсё, пакору, часта не папулярную, але скрываючую ў
сабе сакрэт перамогі. Бэнэдыкт XVI лічыць, што спорт заўсёды павінен знаходзіцца на
службе чалавеку; ён павінен выхоўваць, развіваць духоўна і несці трансцэндэнтныя каштоўнасці.
“Карацей кажучы, культура спорту заснавана на першынстве чалавечай асобы; спорт знаходзіцца
на службе чалавеку, а не чалавек на службе спорту”, - падкрэсліў Святы Айцец.
Пантыфік
нагадаў, што “Касцёл зацікаўлены ў спорце, паколькі клапоціцца пра чалавека, усяго
чалавека, і прызнае, што спартыўная дзейнасць уплывае на адукацыю і фарміраванне асобы,
на адносіны, на духоўнасць”. Пантыфік адзначыў, што сведчаннем таму з’яўляецца вялікая
колькасць спартыўных пляцовак пры парафіях і моладзевых цэнтрах, а хрысціянскія спартыўныя
ініцыятывы з’яўляюцца месцамі развіцця гуманнасці і “моцнага жадання жыць”. Бэнэдыкт
XVI упэўнены, што “спартсмен, які жыве, інтэгральна рэалізуючы гэта досвед, адказна
ажыццяўляе план Бога ў сваім жыцці, навучыцца чуць Яго голас падчас працяглых трэніровак,
каб пазнаць Яго у сваім таварышы, і нават праціўніку”. Спартыўны вопыт, перакананы
Папа, можа дапамагчы адказаць на глыбокія пытанні, якія ставяць новыя пакаленні пра
сэнс жыцця, яго арыенціры і мэту.
Святы Айцец нагадаў італьянскім алімпійцам,
што для многіх яны з’яўляюцца прыкладам для пераймання і таму пакліканы быць сведкамі
гуманнасці. Папа падкрэсліў недапушчальнасць ужывання допінгу для дасягнення хуткіх
высокіх вынікаў. Паводле Пантыфіка менавіта “камандны дух з’яўляецца стымулам, каб
пазбегнуць падобных тупіковых сітуацый” і падтрымліваць тых, хто прызнаў сваю памылку.
Бэндыкт
XVI, спасылаючыся на Год веры ў Касцёле, падкрэсліў, што “спорт можа выхоўваць у чалавеку
духоўную “канкурэнтаздольнасць”, каб жыць перамагаючы зло дабром, хлусню праўдай,
нянавісць любоўю, перш за ўсё, у сабе.