Папа: нават самыя прыгожыя і высакародныя словы без Бога губляюць свой сапраўдны сэнс
14 снежня ў 16.00
на плошчы св. Пятра адбудзецца ўрачыстая прэзентацыя галоўнай ватыканскай ёлкі. На
ёй упершыню будуць запалены святочныя агні. Сёлета дрэва прыбыло з італьянскага рэгіёну
Малізэ. Па традыцыі, у дзень прэзентацыі ёлкі, дэлегацыю ахвярадаўцаў прымае на аўдыенцыі
Бэнэдыкт XVI. Так адбылося і сёння ў Апостальскім палацы. Пантыфік падзякаваў кіраўніцтву
і жыхарам вобласці за дар іх сэрца. Асабіста для Папы, гэта выраз веры, вернасці традыцыям
і адданасці Наступніку св. Пятра, што падтрымліваюць жыхары італьянскага рэгіёну на
працягу стагоддзяў. Менавіта адданасць хрысціянству, на думку Папы, дапаможа ім супрацьстаяць
сацыяльным і культурным праблемам.
Бэнэдыкт XVI нагадаў, што ёлка, упрыгожаная
гірляндамі, з’яўляецца сімвалам святла, якое Хрыстус прынёс у свет праз сваё Нараджэнне.
Гэта святло працягвае свяціць кожнаму чалавеку, асабліва таму хто “павінен прайсці
праз перыяд нявызначанасці і складанасцяў”. Напрацягу гісторыі, заўважыў Святы Айцец,
знаходзіліся такія, хто спрабаваў пагасіць Божае святло, замяняючы яго на ілюзорнае
і зманлівае зіхаценне. Вынікам спробаў выдалення Бога са старонак гісторыі, з’яўляецца
тое, што “нават самыя прыгожыя і высакародныя словы губляюць свой сапраўдны сэнс”,
- заўважыў Пантыфік. “Падумайце аб такіх словах, як “свабода”, “агульнае дабро”, “справядлівасць”,
пазбаўленых укаранення ў Богу і Яго любові”, - звярнуў увагу Папа,без Бога яны губляюць
сувязь з патрабаваннямі праўды і грамадзянскай адказнасці, - падкрэсліў ён.
Святы
Айцец пажадаў жыхарам італьянскага рэгіёну ўмацавання ў веры і “ад усяго сэрца” перадаў
усім ім сваё апостальскае благаслаўленне.
Святочная ёлка вышынёй у 24 метры
прыбыла ў Ватыкан 6 снежня. Светлавая інсталяцыя на ёй будзе белага і жоўтага колераў.
Па традыцыі, пасля дэмантажу святочнага дрэва, у лютым, з яго будуць зроблены цацкі
для дзяцей сірот.