«Սուրիոյ Հայութեան Օգնութիւնը Ամբողջ Հայութեան Պարտաւորութի՛ինն Է» (Կը Վերահաստատէ Արամ Ա. Կաթողիկոս) ։

Անցնող օրերուն ընթացքին, Արամ Ա. Կաթողիկոս յաջորդաբար ընդունեց Լիբանանահայ օգնութեան խաչի պատասխանատուները, ինչպէս նաեւ «Գարակէօզեան» հիմնարկութեան տնօրէնը: Անոնք լայնօրէն զեկուցեցին վեհափառ հայրապետին ընդհանրապէս իրենց կատարած մարդասիրական աշխատանքներուն եւ յատկապէս պայմաններու բերումով ժամանակաւորապէս Լիբանան հաստատուած սուրիահայ մեր զաւակներուն մասին:
Այս առիթով վեհափառ հայրապետը բարձր գնահատելով այս ուղղութեամբ կատարուած աշխատանքը ըսաւ. «Վստահաբար նոյն աշխատանքին լծուած են մեր բարեսիրական միւս հաստատութիւնները, ինչպէս նաեւ այլ կազմակերպութիւններ ու կառոյցներ: Սուրիահայութեան օգնութիւնը ամբողջ հայութեան առաջնահերթութիւնը պէտք է դառնայ: Ճիգ պէտք չէ խնայել օգնութեան հասնելու Սուրիոյ մեր զաւակներուն` իրենց կեանքի այս դժուար օրերուն»: Շարունակելով իր խօսքը` վեհափառ հայրապետը ըսաւ. «Վստահ ենք, որ Հայաստանի մէջ ժամանակաւորապէս կայք հաստատած սուրիահայերուն հայրենի մեր պետութիւնը իր աջակցութիւնը կ՛ընծայէ զանազան ձեւերով: Նոյնը պէտք է կատարուի յատկապէս հոս, Լիբանան ապաստանած մեր ընտանիքներուն, մասնաւորաբար գործի եւ տան դիւրութիւններ ընծայելով անոնց: Գիտենք, որ հայ գործատեղիներուն մէջ մեծ թիւով օտարազգի պաշտօնեաներ կը գործեն: Մեր թելադրութիւնն է, որ մեր բոլոր գործատէրերը իրենց գերագոյն ճիգը կատարեն Սուրիոյ մեր եղբայրներուն ու քոյրերուն գործ հայթայթելու իմաստով»: Ապա վեհափառը կոչ ուղղեց ըսելով. «Նոր տարուան եւ Աստուածայայտնութեան տօներու սեմին, երբ տօնական մթնոլորտ պիտի տիրէ ամէն տեղ, յիշենք դժուարութեան մէջ ապրող Սուրիոյ մեր սիրելի զաւակները, աղօթենք, որ շուտով խաղաղութիւնը հաստատուի սուրիական հայրենիքին մէջ, ինչպէս նաեւ մեր մասնակցութիւնը բերենք սուրիահայութեան օգնութեան աշխատանքներուն»:
( Կաթողիկոսարանի անունով բացուած Սուրիահայութեան օգնութեան ֆոնտին եկած գումարները հանգրուանային կերպով կը փոխանցուին Հալէպի Ազգային Առաջնորդարան` առանց խտրութեան գործածուելու սուրիահայութեան օգնութեան առնչուած զանազան ծրագիրներուն):