Նոր Ցոյցեր Եգիպտոսի Մէջ։ Պաշտպանութեան Նախարարը Քաղաքական Ուժերը Այսօր ՝՝Ազգային
Երկխօսութեան՝՝ Կը Հրաւիրէ։
Հազարաւոր ցուցարարներ երէկ Եգիպտոսի մայրաքաղաք Գահիրէի փողոցները ողողեցին` մասնակցելով
հակադիր հաւաքներու, մինչ նոր սահմանադրութեան մասին 15 դեկտեմբերի համար նախատեսուած
Հանրաքուէին նախօրեակին լարուածութիւնը կը շարունակուի։ Ընդդիմադիր ցուցարարներ չորս
տարբեր քայլարշաւներով ուղղուեցան Իթթիհատիյա նախագահական պալատ: Ընդդիմադիր ցուցարարներ
շրջանցեցին նախագահական պալատին առջեւ բանակին կողմէ հաստատուած անցարգել մը, սակայն
բռնի ուժի կիրարկում տեղի չունեցաւ: Եգիպտոսի նախագահ Մոհամետ Մուրսի բանակին քաղաքայիններ
ձերբակալելու իրաւասութիւն տուած է, սակայն դէպքը ցոյց տուաւ, որ բանակը առնուազն առայժմ
այդ իրաւասութիւնը չ՛ուզեր կիրարկել: Եգիպտոսի դատաւորներու ակումբի ղեկավարը յայտնեց,
որ երկրին դատաւորներուն 90 առ հարիւրը կը մերժէ հանրաքուէին հսկել: Ըստ եգիպտական օրէնքին,
իւրաքանչիւր ընտրական կեդրոն պէտք է դատաւորի մը վերահսկողութեան տակ ըլլայ: Մինչ
այդ, եգիպտական բանակը ազգային երկխօսութեան հրաւէր մը ուղղեց: Եգիպտոսի պաշտպանութեան
նախարար զօր. Ապտել Ֆաթահ Սիսի եգիպտական քաղաքական ու ազգային բոլոր ուժերը, ինչպէս
նաեւ ղպտի եկեղեցւոյ եւ Ազհարի ներկայացուցիչները այսօր հրաւիրեց ազգային երկխօսութեան
մը: Սակայն նախագահական պալատը յայտարարեց, որ երկխօսութիւն կատարելու հրաւէրը նախագահութեան
կողմէ է եւ ոչ թէ պաշտպանութեան նախարարին կողմէ, իսկ «հրաւէրը ուղղուած է քաղաքական
կողմերուն, ինչպէս նաեւ պաշտպանութեան եւ ներքին գործոց նախարարութիւններուն»: Մինչ
այդ, Եգիպտոս քաղաքական խառնակ վիճակին պատճառով Միջազգային դրամական ֆոնտէն խնդրեց յետաձգել
փոխատուութիւնը: Եգիպտոսի վարչապետ Հիշամ Քանտիլ մամլոյ ասուլիսի մը ընթացքին յայտնեց,
որ նախագահ Մուրսիի կողմէ տուրքերու յաւելման ծրագիրի առկախումէն ետք, Եգիպտոս խնդրած
է 4.8 միլիառ տոլարի փոխատուութիւնը յետաձգել: