Святы Айцец змясціў
у інтэрнэце свой першы “твіт”. Гэта адбылося ў Зале Паўла VI адразу пасля завяршэння
агульнай аудыенцыі. Бэнэдыкт XVI зрабіў гэта на электронным планшэце. Дапамаглі яму
ў гэтым супрацоўнікі Папскай рады па сродках масавай камунікацыі. “Дарагія сябры,
я рады звязацца з вамі праз “Твітэр”. Дзякуй за вашы шчодрыя водгукі. Я благаслаўляю
ўсіх вас ад усяго сэрца”, - напісаў Святы Айцец у сваім першым паведамленні. Яно было
апублікавана на ўсіх моўных версіях мікраблогу Папы. На працягу адной гадзіны ў паведамлення
было ўжо каля 20 тыс. “рэтвітаў”, столькі разоў карыстальнікі падзяліліся словамі
Святога Айца з іншымі асобамі ў “Твітэры”.
Пантыфік прыняў рашэнне адказаць
праз “Твітэр” на тры пытанні сваіх падпісчыкаў, якія былі выбраны з тысяч надыходзячых
на яго профіль. На першае з іх Папа адказаў непасрэдна пасля змяшчэння свайго “твіту”.
“Як мы можам правесці Год веры ў нашым паўсядзённым жыцці?”, - запытаўся адзін з падпішчыкаў
на “Твітэр” Святога Айца. “Праз размову з Езусам у малітве, слухаючы, што ён кажа
вам у Евангеллі, і знаходзячы Яго ў тых, хто мае патрэбу”, - адказаў Пантыфік.
На
ангельскай версіі твітэр-мікраблогу Бэнэдыкта XVI ужо зарэгістравалася каля 700 тыс.
карыстальнікаў.