Sintezë e fjalës së kardinalit Anxhelo Skola në Mbrëmësoret e para të festës së Shën
Ambrozit
Edikti i Milanos, i perandorit romak Kostandin, 1700 vjetori i të cilit do të përkujtohet
në vitin 2013, përcakton jo vetëm “fundin progresiv të persekutimeve kundër të kishterëve,
por sidomos, aktin e lindjes së lirisë fetare”. Filloi prej këtij pohimi fjalimi tradicional
i kryeipeshkvit të Milanos, kardinalit Anxhelo Skola, në prag të festës së Shën Ambrozit
e në ditën e përurimit të Vitit kostandinian. Tema e fjalimit: “Edikti i Milanos:
initium liberartis”. E megjithatë, theksoi kardinali, nuk mund të mohohet se ngjarjet,
që pasuan shpalljen e Ediktit nga ana e perandorit romak, qenë mjaft të trazuara për
të krishterët, të cilëve historia nuk ua dha aq lehtë lirinë. “Përzierja e tepruar
ndërmjet pushtetit politik dhe fesë – nënvizoi Anxhelo Skola – mund të përfaqësojë
një çelës të vlefshëm për interpretimin e fazave të ndryshme të praktikimit të lirisë
fetare në histori”. Gjendja ndryshon thellësisht me Deklaratën e Koncilit II të
Vatikanit, “Dignitatis humanae”. Vërtet, Koncili pohon se njeriu ka të drejtë të mos
jetë i detyruar të veprojë kundër ndërgjegjes së vet. Pra, e drejta fetare njihet
si e drejtë themelore e njeriut. Në kundërshtim të plotë me këtë pohim, pranuar tashmë
botërisht, raportet e fundit tregojnë se ndërmjet viteve 2000-2007, në 123 vende është
vërejtur të paktën një formë persekutimi fetar. Ky numër është fatkeqësisht, në rritje,
duke dëshmuar për probleme të rënda në shoqëri, sipas kardinalit Skola. Kryeipeshkvi
i Milanos analizoi më pas aspektet e ndryshme të lirisë fetare: marrëdhëniet ndërmjet
së vërtetës objektive dhe ndërgjegjes individuale, koordinimin ndërmjet bashkësive
fetare dhe pushtetit shtetëror dhe “nga pikpamja teologjike kristiane, çështjen e
interpretimit të universalitetit të shëlbimit të Krishtit para pluralizmit të feve”.
Pastaj, temën e lirisë së kthimit në fe tjetër e atë të dallimit ndërmjet pushtetit
politik e fesë. Sa më shumë shteti të vendosë kufizime, aq më shumë rriten kontrastet
me bazë fetare, vërejti prelati. Më pas, kardinali Anxhelo Skola kujtoi problemet
e ngritura nga ipeshkvijtë e SHBA-ve, pas reformës së shëndetësisë së presidentit
Barak Obama, i cili u imponon institucioneve fetare t’u japin punonjësve të tyre sigurime
shëndetësore, ku përfshihen praktikat kontraceptive dhe abortive. Gjithashtu, dha
shembullin e modelit francez të laicitetit, i cili duke pretenduar të jetë i paanshëm,
faktikisht, kthehet në një model intolerant ndaj fesë. Shteti duhet ta respektojë
gjithmonë shoqërinë civile, theksoi kryeipeshkvi i Milanos, duke u kufizuar në qeverisjen
e saj. Në shoqëritë perëndimore, ndarjet më të thella vërehen ndërmjet kulturës së
shekullarizuar dhe fenomenit fetar e jo, siç mendohet shpesh gabimisht, ndërmjet besimtarëve
të feve të ndryshme. Kështu, shteti, në vend që të mbajë të njëjtën distancë nga fetë,
mbron botëkuptimin, sipas të cilit Zoti nuk është i nevojshëm. Por ky është vetëm
njëri nga këndvështrimet kulturore në një shoqëri pluraliste. Shteti, denoncoi kardinali
Skola, ka bërë të vetën një kulturë të veçantë, “atë të shekullarizuar, që përmes
legjislacionit, bëhet kulturë mbizotëruese e ushtron pushtet negativ ndaj identiteteve
të tjera, sidomos ndaj atyre fetare”, duke i mënjanuar, ose përjashtuar nga sfera
publike. Në të vërtetë, propozoi kardinali, kemi nevojë për një shtet, i cili,
“pa përvetësuar një këndvështrim të caktuar”, të mos e interpretojë pavarësinë nga
feja si shkëputje prej saj, por të krijojë hapësira, që secili prej subjekteve shoqërore
të mund të kontribuojë për të mirën e përbashkët. Pra, liria fetare është pjesë e
një sfide më të madhe: asaj të gjetjes së bazave të reja antropologjike e shoqërore
të bashkëjetesës në shoqëritë e qytetëruara të këtij mijëvjeçari të tretë. Qyteti
i Milanos e tokat e Lombardisë, vazhdoi kryeipeshkvi, do të banohen gjithnjë e më
tepër nga “italianët e rinj”, emigrantët, të cilët duhet të konfrontohen me një shoqëri
gjithnjë e më shumëngjyrëshe, ndërsa qendrat e vërteta të pushtetit do të zhvendosen
gjithnjë e më shumë në Evropë e në botë. Gjithsesi, nënvizoi kardinali Anxhelo Skola,
këto pushtete nuk do të jenë kurrë të paanshëm e do të jenë edhe më të aftë të paraqiten
si protagonistë të shoqërisë, si grupe presioni. Kisha ambroziane, së bashku me Kishat
e tjera, është e thirrur të dëshmojë rëndësinë e përmasës publike të fesë, të kërkojë
forma të reja, që i mbajnë të krishterët të lidhur me rrjetet e solidaritetit, të
mikpritjes, të edukimit në fe e në kulturë. Koha jonë, përfundoi prelati, kërkon një
kulturë më të gjerë e më të re për shoqërinë e për politikën.