Арцыбіскуп Мамбэрці ў АБСЕ аб свабодзе веравызнання
Грамадскаму значэнню
свабоды веравызнання было прысвечана выступленне прадстаўніка Святога Пасаду, арцыбіскупа
Дамініка Мамбэрці, на XIX пасяджэнні Савета міністраў Арганізацыі па бяспецы і супрацоўніцтве
ў Еўропе (АБСЕ), якое праходзіла з 6 па 7 снежня ў ірландскім Дубліне. У сваёй прамове
іерарх звярнуў увагу на актуальныя палітычна-эканамічныя праблемы і выказаў ад імя
Святога Пасаду задавальненне ініцыятывамі, якія ўзніклі на падставе “Кодэксу паводзінаў
па палітычна-ваенным аспектам бяспекі”. Арцыбіскуп Мамбэрці нагадаў пра абавязак краін
спрыяць “культуры жыцця” у свеце. Добрая дзяржава – гэта тая, дзе палітычныя сілы
не забываюцца пра маральны аспект палітыкі, падкрэсліў ватыканскі дыпламат. Іерарх
нагадаў пра фундаментальныя правы інтэгральнага развіцця асобы, дзе права шукаць і
пазнаваць праўду з’яўляецца ключавым.
Арцыбіскуп Мамбэрці звярнуў асаблівую
ўвагу на права да свабоды веравызнання, якое, на яго думку, патрабуе сёння яшчэ большай
абароны чым калі-небудзь, бо знаходзіцца ў кантрасце з ідэалогіяй секулярнага свету.
Поўная гарантыя свободы веравызнання праяўляецца, паводле іерарха, не толькі ў свабодзе
культу, але таксама у публічным вымярэнні, што азначае для веруючых магчымасць удзельнічаць
у будаванні грамадскага парадку. Апошні не можа існаваць пры ўмовах дыскрымінацыі
хрысціян, што па афіцыйных дадзеных з’яўляюцца групай, якая найбольш церпіць з гэтай
прычыны. Іерарх выказаў спадзяванне, што Савет міністраў Арганізацыі па бяспецы і
супрацоўніцтве ў Еўропе надасць асаблівую ўвагу гэтай праблеме і выступіць з канкрэтнымі
прапановамі для барацьбы з дыскрымінацыяй і неталерантнасцю ў адносінах да хрысціян.