Անտիոքի եւ Արեւելքի յոյն ուղղափառ համայնքի Իգնատիոս Դ. Հազիմ պատրիարքը, որ վերջերս
առողջական լուրջ հարցեր կը դիմագրաւէր, երէկ վախճանեցաւ ուղեղի կաթուածի պատճառով: 92-ամեայ
Հազիմ պատրիարքը 33 տարիէ ի վեր կը վարէ պատրիարքի պաշտօնը: Ան 1988-ին կոչուած է արաբներուն
պատրիարքը, երբ ան Թաէֆի մէջ տեղի ունեցած իսլամական խորհրդաժողովին մասնակցած է իբրեւ
քրիստոնէական պատուիրակութեան նախագահ: Յոյն ուղղափառ համայնքի 157-րդ պատրիարքը`
աւազանի անունով Հապիպ Հազիմ, ծնած է 1920-ին` Համայի մէջ: 1965-ին ան նշանակուած է Լաթաքիոյ
առաջնորդ եպիսկոպոս, իսկ 2 յուլիս 1979-ին ընտրուած է Անտիոքի եւ Արեւելքի յոյն ուղղափառ
համայնքի պատրիարք: Հազիմ պատրիարքին մարմինը երէկ կէսօրէ ետք Սեն Ժորժ հիւանդանոցէն
փոխադրուեցաւ Էշրեֆիէի Ս. Նիկողայոս եկեղեցի: Հանրապետութեան նախագահ զօր. Միշել Սլէյման
այցելեց Ս. Նիկողայոս եկեղեցի, ուր ան ցաւակցութիւն յայտնեց Հազիմ պատրիարքին վախճանումին
աիթով: Ան շեշտեց, որ Հազիմ պատրիարքը եղած է իրաւունքի եւ ճշմարտութեան պաշտպանը եւ
մինչեւ իր վերջին շունչը պայքարած է ի խնդիր իրաւունքին յաղթանակին: Ցաւակցութիւն
յայտնեց նաեւ Լիբանանի մէջ Ռուսիոյ դեսպան Ալեքսանտր Զասպիքին, որ շեշտեց, թէ Հազիմ պատրիարքին
կորուստը մեծ է` ընդգծելով, որ ան երկխօսութեան եւ ազգային գոյակցութեան ջատագովն էր: Վարչապետ
Նեժիպ Միքաթի գուժեց Հազիմ պատրիարքին վախճանումը` շեշտելով, որ անոր մահը կորուստ է
արաբներուն եւ լիբանանցիներուն, որովհետեւ Հազիմ պատրիարքը չափաւորականութեան, համախոհութեան
եւ երկխօսութեան զօրակցող հեղինակութիւն էր, որ կը հաւատար բոլոր կրօններուն միջեւ երկխօսութեան: Միքաթի
նախարարաց խորհուրդէն պահանջեց Հազիմ պատրիարքի յուղարկաւորութեան օրը ազգային սուգի
օր հռչակել: Իգնատիոս Դ. Հազիմ պատրիարքին յուղարկաւորութեան արարողութիւնը պիտի կատարուի
յառաջիկայ կիրակի օր, կէսօրուան ժամը 12:00-ին, Էշրեֆիէի Ս. Նիկողայոս եկեղեցւոյ մէջ,
ուրկէ վախճանեալին մարմինը պիտի փոխադրուի Դամասկոսի Մարիամական տաճարը: Նշենք, որ
Լիբանանի տարածքին գործող յոյն ուղղափառ համայնքի բոլոր դպրոցները փակ պիտի մնան հինգշաբթի,
6 եւ ուրբաթ, 7 դեկտեմբերին, Հազիմ պատրիարքի վախճանումին սուգին առիթով: