Пачаў дзейнічаць профіль Бэнэдыкта XVI у “Твітэры”
12 снежня Папа скіруе
сваё першае паведамленне ў “Твітэры”, але з сённяшняга дня ўжо можна далучыцца да
профілю Бэнэдыкта XVI у гэтай сацыяльнай сетцы. Акаунт Святога Айца называецца: @pontifex.
Свае твіт-паведамленні Папа будзе размяшчаць на 8 мовах: англійскай, іспанскай, італьянскай,
партугальскай, нямецкай, польскай, арабскай і французскай. Падчас прэзентацыі твітэр-канала
Папы, якая прайшла 3 снежня ў Ватыкане, адзначалася, што іншыя мовы могуць з’явіцца
ў будучыні. Акрамя таго, гаворка ішла аб тым, што напачатку твіт-паведамленні Святога
Айца будуць прымеркаваны да агульных аўдыенцый, якія праходзяць кожную сераду, але
з цягам часу, яны могуць з’яўляцца часцей. Сваімі першымі “твітамі” Бэнэдыкт XVI
адкажа на пытанні аб жыцці верай. Гэтыя пытанні можна адправіць Папе да 12 снежня
з пазнакай #askpontifex на адной з моваў, на якіх будзе працаваць профіль Святога
Айца. Паведамленні Бэнэдыкта XVI будуць даступныя ўсім карыстальнікам сацыяльнай сеткі
“Твітэр” – імі можна будзе дзяліцца і абмяркоўвываць іх.
У пасланні на Сусветны
дзень сацыяльнай камунікацыі 2013 г. Бэнэдыкт XVI адзначаў, што “неабходна з інтэрэсам
прыглядзецца да розных формаў сайтаў, дадаткаў і сацыяльных сетак, якія могуць дапамагчы
сучаснаму чалавеку перажываць моманты разважанняў і сапраўдных пытанняў, а таксама
знаходзіць прастору для маўчання, нагоду для малітвы, медытацыі і дзялення Божым Словам”.
Стварэнне профіля Бэнэдыкта XVI у “Твітэры” адпавядае прысутнасці Касцёла ва ўсіх
сферах жыцця сучаснага чалавека і з’яўляецца падтрымкай для тых, хто распаўсюджвае
Божае Слова і каталіцкае навучанне на “лічбавым кантыненце”.