Benedikti XVI tha Lutjet e para Mbrëmësore të Ardhjes me të rinjtë universitarë
Benedikti XVI pati një ditë të ngarkuar me veprimtari. Pasdite, në orën 17.30, Bazilika
e Shën Pjetrit në Vatikan u mbush plot e përplot me të rinjtë e Universiteteve Papnore
Romake, por edhe me studentë të tjerë, të cilët morën pjesë në kremtimin e Mbrëmësoreve
të para të Kohës së Ardhjes. Homelia e Atit të Shenjtë u përqendrua pikërisht në pritjen
e Krishtit. Benedikti XVI përdori për herë të parë shkopin e ri baritor, që i ka dhuruar
Rrethi i Shën Pjetrit. Në majë të tij, mund të shihet një kryq, pasqyrë moderne e
atij që pati përdorur i Lumi Piu IX e që Papa e ka përdorur deri tani, në ndryshim
nga kryqi me të Kryqëzuarin, të Gjon Palit II. Në qendër, monograma e Krishtit
nga njëra anë dhe qingji i Pashkëve nga ana tjetër; katër ungjilltarët në skaj të
krahëve, ndërsa mbrapa, katër dijetarë të Kishës: shën Ambrozi, shën Augustini, shën
Athanasi e shën Gjon Gojarti. Simbolika është e qartë: Krishti në qendër, Krishti
– qingj i Pashkëve i vdekur e i ngjallur, dëshmuar nga Shkrimi i Shenjtë (ungjilltarët)
dhe nga Tradita e Kishës (shenjtorët dijetarë). Një përmbledhje teologjie në një vepër
arti. Pikërisht, atë që uronte Benedikti XVI, para pak kohësh, në takimin me artistët
në Kapelën Sikstine.