30 гадоў таму “Opus Dei” атрымала стутус Персанальнай прэлатуры

28 лістапада 1982 г. бл. Ян Павел ІІ апостальскай канстытуцыяй “Ut Sit” надаў “Opus Dei” статус Персанальнай прэлатуры. Гэта арганізацыя была заснавана ў Мадрыдзе ў кастрычніку 1928 г. св. Хасэ Марыяй Эскрыва дэ Балагерам, з мэтай дапамагаць вернікам у імкненні да святасці праз прафесійную дзейнасць. “Усе паслядоўнікі Хрыста павінны супрацоўнічаць у тым, каб знайсці хрысціянскае рашэнне праблем грамадства”, - нагадаў бл. Ян Павел ІІ 30 гадоў таму ў сваім дакуменце, звяртаючыся да членаў “Opus Dei”.

Тэрмін “персанальная ” азначае, што юрысдыкцыя прэлатуры распаўсюджваецца не на канкрэтную тэрыторыю, як у выпадку дыяцэзій, але на пэўную групу вернікаў, якія жывуць на ўсім свеце. Да “Opus Dei” могуць належаць як свецкія вернікі, так і духавенства. У адрозненне ад манаскіх кангрэгацыі, “Opus Dei” падпарадкоўваецца не Кангрэгацыі па справах Інстытутаў кансэкраванага жыцця і Таварыстваў апостальскага жыцця, але Кангрэгацыі па справах Біскупаў.