Սերժ Սարգսեան Հայկազեան Համալսարանին Մէջ։ Այցելութիւն Զմմառու Հայ Կաթողիկէ Վանք։

Պաշտօնական այցով Լիբանան գտնուող Նախագահ Սերժ Սարգսեան նախօրէին այցելած է Հայկազեան համալսարան, ուր հանդիպում ունեցած է Լիբանանի չորս առաջատար համալսարաններու` Հայկազեան, Պէյրութի ամերիկեան (AUB), Լիբանանի ամերիկեան (LAU) եւ Սեն-ժոզէֆ (Saint Joseph) համալսարաններու դասախօսական անձնակազմերուն,եւ միջազգայնագէտ ուսանողներու հետ: Նախագահը հանդէս եկած է ելոյթով եւ պատասխանած է ուսանողները հետաքրքրող հարցումներուն: (Այս մասին կը հաղորդեն ՀՀ նախագահի մամուլի գրասենեակը) :
Նոյեմբեր 27-ին, Սերժ Սարգսեան հանդիպում ունեցած է Մերձաւոր Արեւելքի Հայ Աւետարանական Եկեղեցիներու նախագահ, վերապատուելի Մկրտիչ Քարակէոզեանի հետ, եւ ապա այցելած է հայ հոգեւոր, մշակութային ամենանշանաւոր Օճախներէն մէկը` Զմմառ եւ հանդիպում ունեցած Տանն Կիլիկիոյ Կաթողիկէ Հայոց Կաթողիկոս, Ամենապատիւ Տէր Ներսէս Պետրոս ԺԹ.Պատրիարքի հետ: Նախագահը Զմմառի մէջ մասնակցած է «Ուրբաթագիրք»-ի տպագրութեան 500-ամեակի առիթով Մշակութային Կեդրոնի եւ Մատենադարանի նորոգուած յարկաբաժնի բացումին, այցելած ձեռագիրներու եւ հնատիպ գիրքերու ցուցահանդէսը: