O Zojë e Bekuar, o Nënë e Shenjtë që solle në dritë Mbretin e lavdisë së amshuar e,
pasi e ndoqe me besnikëri deri në Kalvar prite zemërdridhur ngjalljen e Tij, ktheji
sytë e tu kah Shqipëria jonë e dashur, që mbart mbi vete trashëgiminë e madhërueshme të
shenjtërve apostuj, të martirëve, të barinjve, të virgjërave të lume e të sa
e sa dishepujve bujarë të Birit tënd.
Ty, o Zojë, po ta besojmë kombin tonë, që
të njeh e të thërret Nënë.
O shën Mari, hirplote, lutu për ne.
Hidhe
me dashuri vështrimin mbi popullin shqiptar: ti i di mëkatet e virtytet e tij, ia
njeh pasuritë, vlerat dhe mjerimin, dobësitë dhe gjestet e tij të mirësisë. Vigjëlo
mbi shtëpitë e familjet, mbi lagjet e bashkësitë, mbi shkollat e spitalet, mbi
ndërmarrjet, zyrat, kantieret e mbi të gjitha veprimtaritë e tjera të jetës së
përditshme. Ndihmoji të rinjtë, të papunët, të varfërit, të braktisurit, që
kërkojnë një vend e një puhizë shprese në jetë.
O shën Mari, hirplote, lutu
për ne.
Bëj që në brezat e rinj të mos shuhet feja e të parëve që të mbetet
gjallë ndjenja e ndershmërisë dhe e bujarisë, mirëkuptimi, kujdesi për të vegjlit,
të moshuarit e të sëmurët, vëmendja ndaj gjithë njerëzimit, që në çdo anë të
botës vuan e lufton e shpreson në të ardhmen në drejtësi e paqe.
Lutu për
ne, o Virgjër Shenjte, Nënë e përvuajtërisë, Zojë e Këshillit të Mirë, Pajtore
e Shqipërisë, së bashku me shenjtorët e Kishës sonë e me të gjithë dëshmitarët
e Ungjillit, emrat e të cilëve janë shkruar në librin e jetës.
O shën Mari,
hirplote, lutu për ne.
Shkëlqeftë gjithnjë fytyra e Atit Qiellor mbi kombin
tonë, mbi qytetet e mbi fshatrat tona; mbrojtja jote amnore, o Zojë, na shoqëroftë
përditë, në udhën e kohës, drejt takimit përfundimtar me Krishtin, në atdheun e
amshuar. Ai, i ngjallur së vdekurish e i ngjitur në qiell, avokati e ndërmjetësuesi
ynë, jeton e mbretëron në shekuj të shekujve. Amen!