Kuvendi i Shqipërisë nderon protagonistët e Pavarësisë
Kuvendi i Shqipërisë kremtoi dje jubileun e 100-vjetorit të Pavarësisë, me një ceremoni
në nderim të firmëtarëve të Aktit të Pavarësisë, anëtarëve të qeverisë së Lushnjes,
udhëheqësve të kryengritjeve në trevat shqiptare. Siç njofton Parlamenti në faqen
e tij të internetit, protagonistë të një dite me deputetët shqiptarë, ku ishin të
ftuar edhe Presidenti i Republikës, Bujar Nishani, Presidentja e Kosovës, Atifete
Jahjaga, Kryeministri i Shqipërisë Sali Berisha, Kryetari i Kuvendit të Kosovës Jakup
Krasniqi, familjarë dhe pasardhës të të nderuarve, u bënë njerëzit e shquar, që i
dhanë kombit shqiptar “lirinë, mosvarjen e mëvetësinë”, bazat për një zhvillim demokratik
të mëtejshëm. Shumë prej tyre u vranë gjatë regjimit komunist, të tjerë u burgosën
e të tjerë akoma u mohuan, duke bërë ç’është e mundur t’i mbulonin me pluhurin e harresës.
Në fjalën e saj, kryetarja e Kuvendit, Jozefina Topalli, theksoi: “Pa luftën e sakrificën
e tyre, pa trimninë e atdhedashurinë e pashembullt, pa shpirtin e pamposhtur të tyre,
nuk do ishte e mundur pavarësia… Historia e përpjekjeve për të ruajtur pavarësinë
e Shqipërisë është fondamentale, është po aq ekzistenciale, sa dhe përpjekjet, kryengritjet
që çuan në pavarësinë e saj. Historia e përpjekjeve për pavarësi nuk është vetëm histori
pushke e gjaku të atyre që u flijuan, por edhe histori e fortë atdhedashurie e vizioni
të atyre që e projektuan, edhe histori vullneti të pa epëm e atyre që qëndruan. Historia
e përpjekjeve për ndërtimin e shtetit shqiptar, që nis nga Kongresi i Lushnjës është
jo vetëm histori e burrave të shtetit, por edhe histori mendimi e atyre që e shkruan,
histori pune e djerse e atyre që e ndërtuan, histori guximi dhe idealesh të nalta
të atyre që besuan”. Zonja Jozefina Topalli u dhuroi familjarëve të firmëtarëve
të Aktit të Pavarësisë, të udhëheqësve të kryengritjeve në të gjitha trevat shqiptare,
si dhe të afërmve të rilindasve të shquar botimin e veçantë të Kuvendit të Shqipërisë
me Aktet e Themelimit të Shtetit Shqiptar. Ndër patriotët e nderuar dje, shumë eksponentë
katolikë. Po përmendim vetëm dom Nikollë Kaçorrin, firmëtar i Aktit të Pavarësisë;
imzot Luigj Bumçin, kryetar i delegacionit shqiptar në Konferencën e Parisit për kufijtë
e Shqipërisë; Luigj Gurakuqin, firmëtar i Aktit të Pavarësisë; Ndoc Çobën, deputet
e ministër, delegat i Shkodrës në Kongresin e Lushnjës; Dedë Gjo’ Lulin, prijës dhe
luftëtar i Lëvizjes Kombëtare, Hero i Popullit. Kjo ceremoni u bë dhjetë ditë
pas asaj të nderimit të personaliteteve të letrave, të artit e të humanizmit shqiptar,
po në Kuvendin e Shqipërisë. Ndër ta, katolikët: atë Gjergj Fishta, poet (i quajtur
Homeri shqiptar), prozator, dramaturg, estet, publicist, patriot; atë Justin Rrota,
filolog e gjuhëtar, Mësues i Popullit, studiues i “Mesharit” të Buzukut; Pashko Gjeçi,
mjeshtër përkthimi i thesareve të letërsisë botërore, ndër të cilat “Komedia Hyjnore”
e Dantes dhe “Odiseja” e Homerit; Gjon Shllaku, helenist i madh, përkthyes e hartues
fjalorësh; familja Marubi, firmë e njohur fotografësh patriotë nga Shkodra; Çesk Zadeja,
kompozitor i shquar i traditës muzikore shqiptare; Martin Camaj, shkrimtar, gjuhëtar
e filolog; Baltazar Benussi, avokat që kontribuoi në përgatitjen e legjislacionit
modern shqiptar; Luigj Benussi, mjek, themelues i mikrobiologjisë në Shqipëri; Prenkë
Jakova, kompozitor, themelues i operës klasike shqiptare; Lin Delia, një nga emrat
më të mëdhenj të pikturës shqiptare; Tonin Harapi, kompozitor 360 gradësh; Rrok Zojzi,
etnolog, hodhi bazat e kësaj shkence në Shqipëri; Gjok Beci, poet, autor tekstesh
i këngëve pjesëmarrëse në shumë festivale; Lec Kurti, kompozitor i operës së parë
“Arbëreshja”; Tish Daija, kompozitor; Frederik Shiroka, mjek, vendosi bazat e kirurgjisë
moderne në Shqipëri; Injac Zamputi, historian e latinist i shquar.