Papa kardinajve të rinj: Kisha impenjohet për paqen në Lindjen e Mesme dhe në mbarë
botën.
Kisha inkurajon çdo përpjekje për paqen në Lindjen e Mesme dhe në botë. E pohoi këtë
Benedikti XVI sot paradite, në audiencën me kardinajtë e rinj, të shoqëruar nga familjarë,
besimtarë, miq e dashamirë, në Sallën e Palit VI. Papa i nxiti gjashtë kardinajtë
e rinj ta duan Krishtin me gjithë zemër e të jenë dëshmitarë të fortë e të besueshëm
të Tij ndërmjet njerëzve. Ishte, pra një takim i thjeshtë, krejt familjar: kështu
e quajti edhe Benedikti XVI i cili, megjithatë, e shfrytëzoi edhe këtë rast për të
ngritur zërin e për të kërkuar paqen në Lindjen e Mesme. Duke i folur frëngjisht kardinalit
e patrikut maronit, Béchara Boutros Raï, inkurajoi praninë e të krishterëve në Lindjen
e Mesme që, shtoi Papa, duhet ta jetojnë lirisht fenë e tyre. Prej këndej, edhe thirrja
e re për paqe në Rajon: “L’Eglise encourage tout effort…” Kisha,
tha Benedikti XVI, inkurajon të gjitha përpjekjet për paqe në botë e në Lindjen e
Mesme. Është fjala për një paqe, shtoi, që nuk mund të lidhë fryt, në se nuk bazohet
mbi respektin e vërtetë ndërmjet njerëzve. Më pas Ati i Shenjtë uroi që Koha e
Ardhjes t’i ndihmojë të gjithë banorët e zonave të trazuara të botës për ta rizbuluar
madhështinë e Krishtit, që erdhi në botë pikërisht për ta shpëtuar mbarë njerëzimin
e për të sjellë paqe e pajtim. Një mendim të ngjashëm pati Shenjtëria e Tij edhe
për Kolumbinë, në sa përshëndeste spanjisht kardinalin e ri, imzot Rubén Salazar Gómez,
kryeipeshkëv i Bogotà-s. Benedikti XVI uroi që Kolumbia të ecë, me paqë e harmoni,
në udhën e drejtësisë, të pajtimit e të solidaritetit. “The vivid colour
of their robes…” Duke u folur anglisht kardinajve të rinj Harvey (SHBA),
Thottunkal (Indi) dhe Onaiyekan (Nigeri), i porositi ta mbrojnë grigjën që u është
besuar, deri në dhurimin e pikës së fundit të gjakut, ngjyrën e të cilit ka veshja
e tyre e re kardinalore. Në italisht, pohoi se mbështetet fort në ndihmën e kardinajve
të rinj për vijimin e misionit të tij, si Pasardhës i Shën Pjetrit. Së fundi, u drejtoi
Hirësive të Tyre fjalë të ngrohta, inkurajime të forta e urime të përzemërta për
ecjen me sukses në rrugën e re: “Vijoni me besim e forcë misionin
tuaj shpirtëror e apostolik, duke i mbajtur sytë të mbërthyer fort te Krishti e duke
e forcuar dashurinë për Kishën e Tij. Këtë dashuri na e mësojnë Shenjtorët, që janë
realizimi më i plotë i Kishës: ata e deshën e, duke e lënë plotësisht veten në dorë
të Krishtit, e shkrinë shpesh gjithë jetën për ta rrezatuar kudo dritën e Krishtit,
që ndrin fytyrën e Kishës”.