Պենետիկտոս ԺԶ Սրբազան Քահանայապետի Համապատարագը Նոր Նշանակուած Կարդինալեներուն Հետ։

Կիրակի 25 նոյեմբեր 2012 - Տօն ''Քրիստոս Տիեզերքի Թագաւոր '' ըստ լատինաց։

Առաւօտեան ժամը 9,30 Սուրբ Պետրոսի անուան Պազիլիքայի մէջ, Պենետիկտոս ԺԶ Սրբազան Քահանայապետը գլխաւորեց համապատարագի Սուրբ արարողութիւնը որուն իրենց մասնակացութիւնը բերին նոր նշանակուած 6 կարդինալները ու զանազան երկիրներէ այս առթիւ Հռոմ ժամանած պատուիրակութիւններու անդամներուն եւ ուխտաւորներուն ներկայութեամբ։

Նշենք որ նոր կարդինալներն են (Ճէյմս Հարվէյ-ի (ԱՄՆ.էն) , Պշարա Րայի-ի (Լիբանանէն), Պազէլիոս Գլիմիս Թհոթթունգալ-ի (հնդկաստնէն), Ճոն Օլորունֆէմի Օնայէքան-ի (Նիճերիայէն), Ռուբէն Սալազար Կոմէզ-ի (Գոլումպիայէն) եւ Լուիս Անթոնիօ Թակլէ-ի (Փիլիպպեան Կղզեախումբէն)։

Սուրբ Զոհի ընթացքին իր արտասանած քարոզին մէջ Սրբազան Հայրը յատուկէն ողջունեց նոր կարդինալները։Ան ապա ակնարկեց ծիսական ''Յիսուս Տիեզերաց Թագաւոր'' տօնին ու մեկնաբանեց օրուան Սուրբ գրային ընթերցումները։ Աւետարանի ընթերցումը քաղուած էր Յովհաննէսի աւետարանէն ուր հրեաները Յիսուսը կը տանին Պիղատոսին անորմէ խնդրելով որ դատէ զինք։
Պիղատոս հարց կու տայ Յիսուսին ''դուն հրեաներու թագաւո՞րն ես''։ Յիսուս կը պատասխանէ ''իմ թագաւորութիւնս այս աշխարհէն չէ'' յստակացնելով իր թագաւորութեան բնոյթը որ մեսիական, աշխարհական իշխանութիւն մը չէ այլ` ծառայող սէր է։
Յիսուս իր թագաւորութիւնը կ՛ուզէ պաշտպանել ոչ թէ զէնքի ույժով այլ սիրոյ, կեանք պարգեւող ույժով, որ երեւույթապէս տկար կը ներկայանայ։ Ասոր համար է որ անպաշտպան, դիւրաբեկ ու նուաստացած մարդու դիմաց Պիղատոս զարմանքի կը մատնուի ու հարց կու տայ ''Ուրեմն դուն Թագաւո՞ր ես'' ու Յիսուս անոր կը պատասխանէ ''Դուն կ՛ըսես թէ ես Թագաւոր եմ։ Ես ծնած եւ աշխարհ եկած եմ վկայելու համար ճշմարտութեան։ Ով որ ճշմարտութեան կողմն է` կը լսէ իմ ձայնս''։
Յիսուս եկած է աշխարհ վկայելու Աստուծոյ մը ճշմարտութիւնը որ Սէր է ու կ՛ուզէ հաստատել արդարութեան, խաղաղութեան ու սիրոյ թագաւորութիւն մը։
''Ով որ բաց է այս վկայութեան զայն կ՛ընդունի հաւատքով ու կը մտնէ Աստուծոյ արքայութեան մէջ'' - ըսաւ Նորին Սրբութիւնը հուսկ քարոզի աւարտին խօսքը ուղղեց կարդինալական դասին անոնց յանձնառարելով ըլլալու ''Աստուծոյ թագաւորութեան եւ ճշմարտութեան վկաներ''։ Եղէ՛ք այլ ոմն Քրիստոսներ ու անոր նմանելով սիրեցէ՛ք մինչեւ ձեր կեանքի զոհաբերումը ձեր սիրելիներուն համար։Ահա այս է Յիսուսի Թագաւորութիւնը - հաստատեց Սրբազան Քահանայապետը եզրափակելով քարոզը ու հրաւէր ոուղղելով բոլորին միասնաբար աղօթել ''թող գայ քու արքայութիւնդ'' Ամէն։