Në librari, libri i ri i Papës “Fëmijëria e Jezusit”. Koment i atë Lombardit: një
libër, një premtim
Javës që kaloi, doli në librari vëllimi i tretë i Trilogjisë së shkruar nga Papa për
Jezu Krishtin. I titulluar “Fëmijëria e Jezusit”, libri është botuar nga Rizzoli dhe
Shtëpia Botuese e Vatikanit në nëntë gjuhë të ndryshme dhe është shpërndarë njëkohësisht
në 50 vende të botës. Tirazhi i parë i kalon një milion kopje. Në muajt e ardhshëm,
ky vëllim do të përkthehet në 20 gjuhë për t’u përhapur në 72 vende. Zëdhënësi i Selisë
së Shenjtë, atë Federiko Lombardi ia kushton komentin e tij javor pikërisht këtij
libri. Ta dëgjojmë: Libri i ri i Papës mbi fëmijërinë e Jezusit arrin në duart
tona në kohë, për të na shoqëruar shpirtërisht në periudhën e Ardhjes e të Krishtlindjes,
mbushur me kulturë biblike, me reflektim teologjik e shpirtëror. Është mbajtja e një
premtimi, që ai na pati bërë me botimin e vëllimit mbi jetën publike të Jezusit, të
cilin na e përsëriti me botimin e të dytit, mbi Mundimet e Ngjalljen e Krishtit. Megjithëse
na pati thënë qartë se objektivi i veprës së tij ishte “të kuptohej figura e Jezusit,
fjalët dhe gjestet e tij” e nuk përfshinte studimin e drejtpërdrejtë të kapitujve
të Ungjijve për fëmijërinë e Jezusit (shih Premisat e vëllimit të dytë), Papa nuk
deshi të na mohonte këtë “sallë të vogël hyrjeje” për leximin e librave të mëparshëm.
Na e paraqet me përvuajtërinë e tij të zakonshme: “Jam i vetëdijshëm se kjo bisedë
ndërmjet së shkuarës, së tashmes e së ardhmes nuk mund të përfundojë kurrë… Shpresoj
që ky libër i vogël, pavarësisht nga kufizimet e tij, të ndihmojë shumë njerëz në
rrugën e tyre drejt e me Jezusin”. Ashtu si Papa Vojtila i moshuar i pati
treguar botës me guxim shpirtin e tij në meditimin poetik “Triptiku romak”, edhe Papa
Racinger, jo me guxim më të paktë, po tregon vetveten, kërkimin e tij më intim të
fytyrës së Zotit e takimin me Të. E di mirë se shkon drejt kundërshtimeve - nganjëherë
të ligjshme, nganjëherë vetëm pretendime - por ndërthurja e studimit të Shkrimit Shenjt,
me reflektimin teologjik, me kulturën njerëzore e me tensionin shpirtëror personal,
është gjithsesi e jashtëzakonshme dhe shumë tërheqëse. Jozef Racinger e ka përjetuar
vetë, edhe si Papë, dramën e “shkëputjes ndërmjet Jezusit historik dhe Krishtit të
fesë” dhe impenjohet të udhëheqë secilin prej nesh e pra, edhe Kishën, në kapërcimin
e saj, për të na bërë kështu, ta shijojmë qetësisht e thellësisht miqësinë personale
me Jezusin. E ky është një shërbim më themelor e më urgjent se të gjitha impenjimet
e tjera në qeverisjen e Kishës. Pasi Papa është para së gjithash përgjegjës për fenë
e Kishës. Prandaj, e falenderojmë për gjithçka ka bërë, duke e përfunduar veprën pas
nëntë vjetësh impenjimi jo të lehtë. Është me gjithë mend e vërtetë ajo, që thoshte
kardinali Martini, në përfundim të paraqitjes së tij për vëllimin e parë: “Libri është
shumë i bukur e na bën ta kuptojmë më mirë si Jezusin, Birin e Zotit, ashtu edhe fenë
e madhe të autorit”.