Կարտինալական Տիտղոսներու Տուչութեան Արարողութիւն Ս. Պետրոս Պազիլիքայի Մէջ։

Վեց Նոր Կարտինալներու Կենսագրական Գիծերը Հակիրճ Տողերով։
Շաբաթ 24 Նոյեմբերին Հռոմի Ս. Պետրոս Պազիլիքային մէջ տեղի կ՝ունենայ կարտինալական տիտղոսներու տուչութեան արարողութիւնը։
Պենետիկտոս ԺԶ Սրբազան Քահանայապետը իւրաքանչիւր ծիրանաւորին պիտի շնորհէ կարտինալական մատանին եւ գդակը։
Նոր Կարտինալներն են. Ճէյմս Հարվէյ (ԱՄՆ.էն) , Պշարա Րայի (Լիբանանէն), Պազէլիոս Գլիմիս Թհոթթունգալ (հնդկաստնէն), Ճոն Օլորունֆէմի Օնայէքան (Նիճերիայէն), Ռուբէն Սալազար Կոմէզ (Գոլումպիայէն) եւ Լուիս Անթոնիօ Թակլէ (Փիլիպպեան Կղզեախումբէն)։
Այս առթիւ հակիրճ տողերով կ՝անդրադառնանք նոր կարտինալներու կենսագրական գիծերուն։
Ամերիկացի Ճէյմս Հարվէյ, 63 տարեկան է, 14 տարիէ ի վեր քահանայապետական տան կառավարիչն է։ Ի մօտոյ կարտ. Հարվէյ պիտի անուանուի նաեւ Ս. Պօղոսի անուան գեղեցիկ պազիլիքայի Աւագերեցը։
Լիբանացի Մարոնիներու պատրիարքը՝ 72-ամեայ Պշարա Րայի, նստավայրը Պըքէրքէ-Լիբանան. ան 2011-ին Պատրիարք ընտրուեցաւ, եւ գործօն դեր ունեցաւ Սրբազան Քահանայապետին Լիբանան կատարած այցելութեան ընթացքին։
Հնդկաստանէն՝ 53-ամեայ Պազէլիոս Գլիմիս արք. Թհոթթունգալ, 2008-էն ի վեր, Աւագ Արքեպիսկոպոսն է Թրիվանտրումի ՜՜Ասորի-Մալանքար՝՝ համայնքին, որ ունի շուրջ 450’000 հաւատացեալներ, եւ որոնց մեծամասնութիւնը կը գտնուի Քերալայի մէջ։
Իսկ Նիճերիացի 68-ամեայ Ճոն Օլորունֆէմի Օնայէքան 1992-ին Ապուժայի եպիսկոպոս անուանուեցաւ, իսկ 1994-ին՝ Արքեպիսկոպոս։ Ներկայիս նախագահն է Մատակասքարի ու Ափրիկէի եպիսկոպոսաց համահաւաք դասին։ Ներկայիս ան թիրախ է ծայրայեղ իսլամ ահաբեկիչներու։
Գոլոմպիացի 70-ամեայ Ռուբէն Սալազար Կոմէզ՝ Արքեպիսկոպոսն է Պոկոթայի 2010-էն ի վեր։ Ներկայիս Գոլոմպիայի եպիսկոպոսաց համահաւաք դասի նախագահն է։
Հուսկ՝ Փիլիպեան Կղզեախումբէն ցի Լուիս Անթոնիօ Թակլէ՝ 55 տարեկան, Մանիլիայի Արքեպիսկոպոսը 2011-էն ի վեր։ Այլ երեք նոր կարտինալներու հետ ան մասնակցեցաւ Վատիկանի մէջ, ՜՜ Նոր Աւետարանութեան՝՝ մասին Սիւնհոդոսին։