“Fëmijëria e Jezusit” dhuratë e çmuar feje e kulture. U paraqit sot vëllimi tretë
i veprës së Benediktit XVI “Jezusi i Nazaretit”
Paraqitjen e vëllimit të tretë të veprës “Jezusi i Nazaretit”, kushtuar “Fëmijërisë
së Jezusit”, shkruar nga Jozef Ratcinger-Papa Benedikti XVI e kryesoi sot në Vatikan
kryetar i Këshillit Papnor të Kulturës, kardinali Xhanfranko Ravazi. Vepra,
shtypur nga Shtypshkronja e Vatikanit e nga Shtëpia mirënjohur Botuese italiane Rizzoli,
u paraqit në Sallën e Piut X, në Romë, duke filluar nga ora 11.00. Përveç kardinalit
Ravazi, folën edhe Maria Klara Bingemer, pedagoge e teologjisë pranë Universitetit
Papnor Katolik të Rio-dé-Janeiros; drejtori i Lev (Shtëpia Botuese e Vatikanit), Giuseppe
Costa; Paolo Mieli, kryetar i Rcs Libri (Shtëpia Botuese Rizzoli). Takimin e drejtoi
atë Federiko Lombardi, drejtor i Sallës vatikanase të Shtypit dhe i Radios sonë, i
cili tha se "Benedikti XVI e mbajti premtimin, duke i bërë popullit të Hyjit një dhuratë
të çmuar feje e kulture". Në konferencën e shtypit të gjithë folësit e vunë theksin
mbi përpjekjen e jashtëzakonshme që bëri Jozef Ratcinger për të plotësuar trilogjinë
kushtuar jetës së Jezusit të Nazaretit. Një vepër, që nisi tetë vjet më parë e që
Papa e vijoi me ngulm të madh, i vetëdijshëm se realizimi i saj ishte urgjent për
të gjithë besimtarët. Reflektimi i atë Lombardit: “Vetëm guximi i
madh e pasioni i madh mund të krijonin kushte për të arritur në port, në vite gjatë
të cilave impenjimet e qeverisjes së Kishës universale janë kaq të mëdha. Për shumë
nga ne, fakti që Papa ia arriti qëllimit, duket gati i pabesueshëm e shkakton admirim
të madh e mirënjohje edhe më të madhe. Libri i vogël, sot në duart tona, ndoshta duket
i vogël si vëllim, por nuk është aspak i vogël si vlerë”. Kardinali Xhanfranko
Ravazi e rilexoi librin e Benediktit XVI në këndvështrimin e binomeve histori-fe e
autor-lexues. Hirësia e Tij vuri në dukje se Ungjijtë e Fëmijërisë së Jezusit nuk
janë vetëm tekst informues, por sidomos formues. Prej këndej libri i ri i Papës na
bën menjëherë për vete, sepse na vë përballë një historie gjithnjë aktuale: “Mendoj
për britmën e nënave në masakrën e fëmijëve të pafajshëm, britmë e përhershme, e përsëritur;
britmë universale, që vijojmë ta dëgjojmë edhe në ditët tona. Vdesin fëmijë në Gazë,
e britma e nënave vijon të tundë botën. E shikoni: tregimi nuk përfundon në faqet
e librit, në rrethanat e tij historike”. Rrëfimi na çon shpesh nga kohët
e Krishtit, në kohët tona, duke na rikthyer përsëri në fëmijërinë e Zotit. Prej këndej,
nuk mund ta shikojmë thjesht si dhuratë Krishtlindjesh: “Pse është një fëmijë
në qendër të tij, kjo nuk do të thotë se kemi të bëjmë me retorikë sentimentale; se
duhet ta mbështjellim këtë libër e këto faqe me letër qindisur me yje, që përdoret
për të mbështjellë dhuratat e Krishtlindjes... Jo, ky është një libër … i mbështetur
mbi Ungjillin e fëmijërisë, e ky Ungjill është për njerëz të rritur, me pjekuri në
fe”. Pastaj, shtoi kardinali Ravazi, libri kushtuar Fëmijërisë së Jezusit
ka vlerën e një teksti, që mund të lexohet nga të gjithë. Është shkruar qartë e me
përvujtëri të madhe: “Ja, ky libër nuk krijon atë vështirësi leximi, që krijojnë
disa faqe teologjike ose filozofike të palexueshme, sepse tepër të vështira. Benedikti
XVI vuri në praktikë atë, që një filozof i shekullit të kaluar, i njohur për përdorimin
mjeshtror të gjuhës, e pati deklaruar, por pa e vënë kurrë në praktikë: gjithçka që
mund të thuhet, mund e duhet thënë qartë”. Mbi përmasën e dhuratës që përfaqëson
ky libër për të gjithë besimtarët, e edhe jo besimtarët, foli kryesisht teologia
Maria Klara Bingemer: “Papa na fton, pra, përmes këtij libri, të krijojmë
një hapësirë. Duke u përgatitur për të kremtuar festën e madhe të Krishtlindjes, ky
libër mund të na ndihmojë të krijojmë brenda nesh një hapësirë, që Zoti të lindë
e të dëftohet në një botë si jona, që ka aq shumë nevojë për Ungjillin e Tij”. Giuseppe
Costa shtoi: “Në këtë libër gjejmë, njëherësh me agimin e Jezusit e të
Marisë, edhe atë të fesë sonë”. Së fundi, Paolo Mieli pohoi se ky
vëllim nuk është thjesht vepër e një Pape, por edhe e një burri, si Jozef Ratcinger,
një nga figurat më të rëndësishme të kulturës evropiane. Prej këndej, drejtori i Ricolit
u ndalua kryesisht tek figurat kryesore të librit: Jezusi e Maria: “Është
i veçantë ky libër, sepse në qendër është figura e një fëmije dhe e një gruaje. Është
libër mbi gruan, Marinë, që merr lajmin e madh, mbi lirinë e saj për ta pranuar këtë
lajm, për të marrë pjesë, për t’u bërë protagoniste e Lindjes së Jezusit”. Atë
Lombardi e përfundoi konferencën e shtypit duke cituar fjalët, që pati thënë kardinali
Karlo Maria Martini për librin e parë të Papës Ratzinger kushtuar Jezusit të Nazaretit.
Një libër, pati shkruar kryeipeshkvi i Milanos, të cilin e lexova gjithë gëzim. Prej
këndej, urimi i atë Lombardit:“Urojmë gëzim të madh gjatë leximit të
këtyre vëllimeve e sidomos këtij, që na përgatit për Krishtlindje”.