Ватыканскі астраном: мы не можам сказаць, што будзе з нашым светам праз 10-15 гадоў
“Сусвет не з’яўляецца
вынікам хаосу, у самой яго натуры існуе логіка, што дазваляе нам весці даследаванні,
адкрываць законы фізікі і разумець іх”, - сказаў айцец Хасэ Фунэс, дырэктар Ватыканскай
абсераваторыі ў інтэрв’ю нашаму радыё. Святар нагадаў словы Бэнэдыкта ХVI, які, сустракаючыся
нядаўна з навукоўцамі з усяго свету, падкрэсліў, што сусвет мае сваю рацыянальнасць
і натуру. “Гэта дазваляе нам займацца навукай, таму, што ў ёй заключана логіка, (...)
дазваляе разважаць і знаходзіць законы у натуры, якая адлюстроўвае гэты парадак, гэты
логас”, - падкрэсліў кс. Фунэс.
Езуіт адзначыў, што чалавек, магчыма, не самотны
ў гэтым сусвеце. “Да сённяшняга дня мы не знайшлі ніякага доказу таго, што існуе пазазямное
жыццё, але ў сусвеце з міліярдамі галактык, кожная з якіх мае мільярды зорак, (...)
мы не можам гарантаваць, што недзе не існуе жыццё”, - адзначыў дырэктар Ватыканскай
абсерваторыі. Паводле яго слоў, пошук іншага жыцця, вельмі цяжкі, але, ведучы яго,
мы можам лепш зразумець саміх сябе і тое, што з’яўляецца крыніцай нашага жыцця. Акрамя
таго, мы можам лепш пазнаць, як стваралася наша сонечная сістэма і як фармаваліся
сістэмы іншых планет.
Гаворачы аб адносінах паміж Касцёлам і навукай, кс. Фунэс
адзначыў, што навука і вера знаходзяцца ў гармоніі, а ў гістарычнай традыцыі Касцёла
заўсёды існавала вялікая зацікаўленасць навукай. Езуіт-навуковец нагадаў, што хоць
астраномія як навука існуе ўжо шмат стагоддзяў, яна не можа сказаць з упэўненасцю,
што будзе з нашым светам праз 10-15 гадоў. І гэта падштурхоўвае, паводле яго, да захаплення
і разважання над таямніцай сусвету і роляй уцелаўлення Божага Сына ў ім.