Kisha katolike për Pavarësinë e Shqipërisë: rivlerësim i historisë; Rubigu i mohuar
Shkëputëm, për emisionin e 12-të të rubrikës “Kisha katolike për Pavarësinë
e Shqipërisë” një fragment nga vepra e Atë Paulinit, prof. Margjokaj, titulluarKontributi i Pukës për pavarsí të Shqipnisë,titulluar“Rrubigu, çerdhe e atdhedashësve”. Shkruan françeskani shqiptar: “Rrubigu
kje porsi çerdhe kû u struken njerz me randsí, të cilët mâ vonë u banë ministra, deputet
e komandanta ushtrijet; mâ teper se njiherë edhe vetë N.M. e Tij mbreti i sotshem”
– kshtu lexohet në Hylli i Dritës 1937, Nr fruer-marc, fq 74. Në Rrubig, si na
kumbton i atë Pal Dodaj në të njajtin vend të cituem, kje shkrue memorandum-i5,
në bazë të të cilit në kongresin e Shkupit Shqipnija do të delte autonome. Ky dokument
u shkrue n’emen të kryetarve të Shqipnisë së Mesme e të Veriut e u kompilue me bashkëpunimin
e ipeshkvit të Lezhës (emzot Luigj Bumçit), t’ipeshkvit të Zadrimës-Pukë (Emzot Gjergj
Koleci), të Pal Dodaj, të Gjergj Fishtës e të Dom Nikollë Kimzës. Si shperthei
lufta ballkanike, prap në kuvendin e Rrubigut kjenë mbajtë dý mbledhje tjera: njana
nen kryesinë e arqipeshkvit të Durrësit, imzot Prenk Bianchi, tjetra nen ipeshkvin
e Zadrimës e nen Abatin e Mirditës (Prenk Doçi). Nder kto dý mledhje u rrah çashtja
nëse ishte mâ mirë per Shqiptarë me u bashkue me Lidhjen Ballkanike apo me u bâ me
ushtrí otomane, mbasi të kishim xjerrë prej Turkisë sigurimin e pavarsisë kombtare.
Pal Dodaj nuk na e thotë kjartë n’artikullin e vet (Hylli i Dritës, citue sypri)
se si e danë ket çashtje, ai na thotë vetem se “kto dý mbledhje paten per qellim me
dá a ishte mâ mirë…”, por nuk thotë se kshtu apo ashtu e dane. Poeti kombtar ka
dashtë me na e bâ të pavdekshem emnin e ktij frati, prandej e ka shtî në Lahutë
të Malsisë. Në kangen 28 na kallxon Fishta se si nji heró i Malsisë, me
emen Llesh Nik Daka, jet i varruem randë në Rrushkull afer Durrësit prej pushkve
trathtare shqiptare e se ky lypë me e çue në kishë të Fretenve në Rrubig, ku dishron
me kenë i vorruem ( kjo ngarje âsht historike): Pater Pali ç’âsht mjerue! Me
dore ballit ç’i ka rà E po thotë gati tue kjá: Oj Shqypní, mjera
Shqypní, Mjaft po drue, se me krye n’hî Per gjithmonë per t’mbetun
ké, N’ prêhen t’and q’se mujn me lé Ksi gjarpijsh, qi, besë e
fé Lânë mbas doret, me trathtí Mund t’bâjnë n’vllazen kshtu kerdí. Atherë
trimin e vorruene, E vorruen m’at mâje krepit” Ku komita lodhë
gazepit T’Shkjaut e t’Turkut, gjêjshin mproje Strehë, pushim e
prap ndoj koje Bukë e zemer; e kû frati Të varruemve u rrite gati, Varrët
tue u a lá edhe tue ua ndrrue: Krenët me kshille tue i drejtue. Persê,
ç’merr prej Sallsatikut E del m’Sh’Mark, n’Kuvend të Rrubigut E
ki’n strofllin t’gjith njata Qi me puplë a me pushkë m’krah, T’kshtenë
e turq, ishin betue, Jashtë Shqypnis Turkun m’e dbue… Atë Pal
Dodaj ishte Kosovar prej Janjevet, prej kah âsht kenë edhe Atë Shtjefen Geçovi,
qi Serbët e mbyten në vj. 1929, prej kah âsht kenë edhe Atë Luigj Paliqi,
qi shkjetë e paten mbytë me 7 marc 1913, prej kah ishte edhe Atë Loro Mitroviqi
(Mazreku) qi e mbyten komunistat serbo-shqiptarë ase mâ mirë me thanë shqiptarët
komunistë të shtymë prej Serbve në vj. 1943. Sikurse kta tre freten kosovarë
i kan mbytë Serbët, nuk âsht per t’u pritë tjeter veçse edhe i katerti, Atë Pal
Dodaj, të hidhej në burg komunist dhe aty të vdiste. Në Rrubig lajmet i merrte
AtëPal Dodaj prej nji miku të vet qi rrite në Shengjin. Ky ishte agjent i
Loyd-it Trieshtin (Shoqnija e Vaporreve mâ e madhja e Austro-Ungerisë) e quhej Fr.
U. Matković. Si kroat qi ishte, simpatizote per Shqiptarë e ishte i njoftun me Pater
Palin shum vjet perpara. Krye javet ky merrte prej Matkovićit jo vetem gazeta me shumicë,
por edhe lajme tjera të shkrueme nder letra të mshehuna nder gazeta mbrendë, lajme
qi Matkovići i ndiete prej vetë oficerave serb e malazez (Shengjinin e kishin kta
në dorë qysh në fillim të luftës ballkanike) si edhe prej kapitanavet t’anijeve qi
kalojshin neper limâ. Mund të thohet prá se kurrnji vend në Shqipní nuk kishte aso
here mundsinë me e njoftë mâ mirë gjendjen e Shqipnisë si edhe gjendjen e politikës
europjane në lidhní me atdhenë t’onë në rrezik me mbetë i shkyem nder çapoj t’anmiqvet”.
Vrasja
e Hasan Riza Pashës e Flamuri Kombëtar në Shkodër Po himë tashti në mbrapaskenë,
pale a po mundemi t’a kuptojmë sadopak se si e tek ndodhi kjo punë e shemtueme, dmth.
Vrasa e Hasan Rizasë. Lexojmë në Hyll të Dritës 1937, nr. i nandorit (25
vjetori i pavarsisë shqiptare), në faqe 529 v. se kah marimi i vj. 1912 Hasan Rizaja
pat thirrë Kel Marubin (fotograf i njoftun në Shkoder), i cili ishte i njoftun mirë
edhe prej qeverisë turke si propagandist i fortë i idesë kombtare. Komandanti
turk i bani Kelit vrejtje mbí vrejtje per sa punë të kalueme e të freskta në kundershtim
me politikë turke. Si e provoi mirë e mirë se per ç’ideal kishte punue, së mbramit
Hasani i tha: “T’a kishe zemren si ké veprat, paçë me e bâ nji punë me ty.” -Keli
e perforcoi edhe ma teper karakterin e vet e ndiesitë e veta kombtare. Atëherë Hasan
Rizaja ia kputi shkurt: “Ban çmos e m’a puno nji flamur Shqipnijet e mbas 4 ditsh
ké me m’a prû; por rueju se të dikton kush!” Keli e muer mbí vedi atë detyrë t’ambel
e tanë gzim shkoi fill te arqipeshvi Serreqi, e mbas kshillit të tij punoi nji flamur
të madh mndashit me shqype dykrenshe, qi i kishte krahët në të ramë. Flamuri s’kje
pelqye, pse teper i hollë, prandej kje punue prej murgeshave stigmatine nji
tjeter, cohet mâ të trashë. Si mbas të njajtit autor, në të njajtin vend’ t’artikullit
të cituem tashti, lajmi i mbramë qi Hasan Rizaja i dergoi mikut të vet, Gjergj
Fishtës, kje ky: “Neser ka me u ngrehë flamuri i Shqipnisë” Por të nesermen nuk
e priti, pse shí atë natë kje vrá ( 21 kallnduer 1913). I njajti na thotë se Hasan
Rizaja pat kenë marrë vesht me klerin katolik të Shkodrës qi me ngrehë flamurin e
Shqipnisë në Kalà të Shkodres e mejherë mbas malsinat e Veriut do të kishin per t’i
rà ushtrisë rrethuese në rasë se kjo nuk do të terhiqej vullnetisht. Per ket qellim,
nen kryesinë e Abatit, Prend Doçit, si edhe të Kapidanit të Mirditës kje bâ nji mbledhje
e msheftë kû lidhen besë 19 bajrakë: Mirditë, Pukë, Malsí e Lezhës e Kthellë; si delegat
i Pukës kje Bib Ndoja. Mbasi u vrá Hasan Rizaja veprimi i malsive nuk u krye, pse
Malsitë nuk kishin se per kê me luftue, mbasi flamur shqiptar në Kalá të Shkodrës
nuk shifshin. Marrë nga “Hylli i Dritës, n. 2, 2012; Paulin Margjokaj, Kontributi
i Pukës për pavarsí të Shqipnisë; Kapitull i katert, fq 3-7.