Paqja dhe vlera e kulturave afrikane në qendër të takimit ndërmjet Papës dhe presidentit
të Beninit
Benedikti XVI priti sot në Vatikan, presidentin e Beninit, Thomas Boni Yayi, i cili
u takua më pas edhe me Sekretarin e Shtetit, kardinalin Tarçizio Bertone dhe me nënsekretarin
e Marrëdhënieve me Shtetet, imzot Etore Balestrero. “Gjatë bisedimeve të përzemërta
– lajmëron Salla e Shtypit e Vatikanit – u vunë në dukje marrëdhëniet e mira ndërmjet
Selisë së Shenjtë dhe Beninit, duke kujtuar, në veçanti, udhëtimin apostolik të Atit
të Shenjtë vitin e kaluar, si edhe kontributin e Kishës Katolike në zhvillimin e vendit”.
Më pas u diskutua për vlerën e kulturave afrikane dhe mbi rëndësinë e Kishës në
edukimin e paqes e të pajtimit. Së fundi, u fol për sfidat e kontinentit, për të cilat
punon kreu i shtetit të Beninit, që është njëkohësisht edhe president i Bashkimit
Afrikan.