Muzika kishtare gjallëron fenë dhe shpreh me tinguj, bukurinë e Zotit.
Muzika në liturgji nuk është thjesht fakt estetik. Ajo e ndihmon besimtarin ta ndjejë
e ta shprehë më thellë fenë, duke kontribuar fuqimisht për ungjillëzimin e ri. Kështu
mendon Benedikti XVI. Për të shpjeguar ç’është në gjendje të bëjë muzika kishtare,
Papa mbështetet mbi dy dëshmi të mirënjohura. Së pari, mbi dëshminë e Shën Agostinit
të Iponës, atit të madh të Kishës së shekullit IV-V, që tregon se nuk i mbante dot
lotët, sa herë dëgjonte Psalmet e kënduara në liturgjitë e Shën Ambrozit, në Milano.
E, së dyti, mbi atë të Pol Klodelit, poetit e dramaturgut të famshëm francez, vdekur
në gjysmën e nëntëqindës, që u kthye në fenë e krishterë në një çast të vetëm: një
çast i madh, i fuqishëm, në të cilin e ndjeu Zotin në zemër. E ja si ndodhi: Ishte
pasdite vonë. Ai arriti para Katedrales së Shën Marisë së Parisit. U çudit, kur pa
një turmë të madhe njerëzish, që hynin brenda. Papritmas iu kujtua se ishte data
24 dhjetor, Nata e Krishtlindjes. Vendosi të hyjë, thjeshtë për të parë ç’po ndodhte.
Ishte koha e lutjeve të mbrëmjes. Me që ishte festë e madhe, mbrëmësoret këndoheshin
nga kori i fëmijëve. Për t’i dëgjuar më mirë, u afrua tek elteri e u fsheh pas një
shtylle, më të djathtë. Filloi Magnificat, lutja që këndoi Maria, për të shprehur
gëzimin e Ardhjes së Jezusit. Magnificat – Himni që madhëron Zotin, flet për gëzim,
shpresë, besim. Të gjitha, në kundërshtim të plotë me humorin e Polit. Por ja që,
papritmas, u prek thellë në shpirt. Nuk e kuptoi ç’po i ndodhte, por e ndjeu veten
të lumtur. Nisi të mendojë se jeta është e bukur, se Jezusi ka lindur vërtet ndërmjet
njerëzve, për t’i shëlbuar. Më vonë do të shkruante: “Në një çast të vetëm,
zemra ime u prek e besova”. Atë natë Krishtlindjeje të vitit 1886, Poli takoi Zotin
në Katedralen Notre – Dame: “Në se feja lind gjithnjë nga dëgjimi i Fjalës
së Hyjit, ky dëgjim, nga shqisat, kalon në mendje e në zemër, duke krijuar komunikimin
e fuqishëm me Zotin. E kjo ndodh posaçërisht kur këndohen himnet e psalmet”,
na kujton Benedikti XVI. Sipas Papës, dëshmia e Shën Agostinit ndihmon për të kuptuar
atë, që shkruhet në Sacrosantum Concilium, Kushtetutë e Koncilit II të Vatikanit,
kushtuar liturgjisë: “Kënga kishtare, me fjalët e muzikën e saj, është pjesë tejet
e nevojshme e përbërëse e liturgjisë solemne". Ati i Shenjtë vëren: “Pse
themi e nevojshme e përbërëse? Sigurisht jo për shkaqe thjesht estetike, në kuptimin
e cektë të kësaj fjale, por sepse bashkëpunon për ta ushqyer e për ta shprehur fenë,
e prej këndej, për lavdinë e Zotit e shenjtërimin e besimtarëve, që është edhe qëllimi
i saj. Prandaj dëshiroj t’i falënderoj muzikantët për shërbimin e madh që i bëjnë
Kishës: muzika, e cila shoqëron liturgjinë, nuk është zbukurim i saj: është edhe vetë
liturgji”. Himni Magnifikat, që davariti çdo dyshim nga mendja e Klodelit,
është përvojë e njeriut të ditëve tona. Benedikti XVI e shikon si dëshmi, që flet
vetë për ndihmesën e këngës kishtare, e cila ndikon fuqimisht për ta thithur në shpirt
Fjalën e Zotit, fjalën e thënë e fjalën e kënduar: “Por, shton Papa, pa
kujtuar vetëm personalitete të shquara, të mendojmë sa e sa njerëz u prekën në thellësi
të shpirtit, duke dëgjuar muzikë kishtare; e sa të tjerë e ndjenë në zemër praninë
e Zotit, të tërhequr nga muzika liturgjike, ashtu si Klodeli”. Prej këndej,
gjithnjë sipas Papës, muzikanët kanjë rol vërtet të rëndësishëm. E Ati i Shenjtë i
fton: “Impenjohuni ta përmirësoni cilësinë e këngës liturgjike, duke shfrytëzuar
traditën e madhe muzikore të Kishës, që me melodinë gregoriane e polifoninë, arriti
dy nga kulmet e veta më të larta”. Papa uron që kompozitorët e
muzikës liturgjike, e cila jehon në hapësirat e kishave të mbarë botës, t’i dhurojnë
Kishës kryevepra të reja. Vepra që dalin nga shpirti, për të hyrë në shpirt. Duke
u treguar, kështu, të gjithëve, se në Kishë bukuria është në shtëpi të vet!