Në Tiranë, vazhdon asambleja e përgjithshme e ipeshkvijve
100-vjetori i Pavarësisë së Shqipërise, Viti i Fesë, ungjillëzimi i ri, 50-vjetori
i Koncilit II të Vatikanit: janë disa nga temat, në qendër të asamblesë së përgjithshme
të Konferencës Ipeshkvnore të Shqipërisë, mbledhur që dje në Tiranë. Ipeshkvijtë ishin
sot të pranishëm në përurimin e vitit të ri akademik të Universitetit Katolik “Zoja
e Këshillit të Mirë”, por dje e sot vazhduan të reflektojnë mbi mënyrën e përjetimit
të Përvjetorit të madh të Pavarësisë nga ana e Kishës, duke përcaktuar linja të reja
për vitin që vjen, gjatë të cilit do të përkujtohet 1700-vjetori i Ediktit të Milanos.
Ipeshkvi i Rrëshenit, imzot Kristofor Palmieri foli mbi Sinodin e Ipeshkvijve për
Ungjillëzimin e Ri, që u mbajt në tetor në Vatikan, e në të cilin mori pjesë edhe
ai vetë. Studimi i dokumenteve të Koncilit, Meshari i ri, Katekizmi i Kishës Katolike,
Doracaku “YouCat”, që janë përkthyer në shqip e do të publikohen së shpejti, janë
shenja të impenjimit të Kishës Katolike në ungjillëzimin e ri të trojeve shqiptare.
Ipeshkvijtë po përcaktojnë edhe veprimtaritë baritore në Vitin e Fesë, gjatë të cilit
besimtarët janë të thirrur të rizbulojnë rrënjët e tyre në Krishtin.