Ndihma e Papës për refugjatët sirianë, në tregimin e të dërguarit në Liban, kardinalit
Robert Sarah. Pjesa II
Ju ftojmë sot të ndiqni pjesën e dytë të intervistës dhënë Radios sonë nga kardinali
Robert Sarah, në përfundim të vizitës së tij në Liban. Në pjesën e parë, ndërmjet
tjerash, Hirësia e Tij foli me shumë shqetësim për gjendjen e refugjatëve sirianë,
të cilët, përveç mungesave materiale, druhen edhe nga rreziqe të tjera të mundshme,
siç është rreziku i devijimit integralist islamik në vendin e tyre...
Përgjigje:
- Të krishterët kanë shumë frikë nga kjo mundësi; e pikërisht për këtë, nuk dëshirojnë
të regjistrohen në kampe: duan të shkojnë në familje ose në famulli. Disa më treguan
se i kanë keqtrajtuar. E nuk janë vetëm refugjatët, ata që kanë frikë: edhe Kisha
druhet se pas pak në këtë zonë nuk do të ketë më asnjë të krishterë.
Pyetje:
- Para se të niseshit, Papa ju dorëzoi një milion dollarë. Si u shpërnda kjo shumë
ndërmjet agjencive të ndryshme bamirëse katolike në rajon?
Përgjigje: -
Është vetëm një pikë ujë, në oqeanin e nevojave. Gjithsesi, kjo dhuratë u vlerësua
shumë nga popullsia. I dhamë përparësi Sirisë, sepse brenda vendit ka mbi dy milion
njerëz të shpërngulur. Për Sirinë dhamë 700 mijë dollarë, e për karitaset e tjera:
Turqi, Liban, Jordani e Irak, 300 mijët, që mbetën. Duke u kërkuar, ndërkaq, organizatave
të shumta bamirëse të Kishës të tregohen gjithnjë më bujare, sepse e dimë që lufta
mund ta shtojë numrin e refugjatëve e, prej këndej, edhe nevojën për ndihma. Ndërkaq
po përpiqemi të mbledhim fonde të reja. Takimi i 9 nëntorit u bë pikërisht për të
koordinuar ndihmat tona. Shpresojmë se do të arrijnë edhe dhurata të tjera për të
përballuar mundësinë e rritjes së numrit të refugjatëve, në se lufta do të vijojë
kështu.
Pyetje: - Besoni se konflikti nuk duket se do të përfundojë
shpejt?
Përgjigje: - Nuk duket, nuk duket, sepse si qeveria, ashtu edhe
kryengritësit, janë të vendosur për të arritur fitoren përfundimtare; secili dëshiron
të fitojë, e kështu nuk mund t’i jepet fund luftës. Shpresojmë se bashkësia ndërkombëtare
do të ndërhyjë, do të diskutojë e do t’ia rikthejë paqen këtij vendi të masakruar.
Pyetje:
- Dje theksuam se Lidhja Arabe njohu ligjshmërinë e koalicionit të opozitës siriane,
formuar në takimet e Dohës, në fundin e javës së kaluar. Mendoni se ky koalicion mund
të ndihmojë për t’i dhënë fund konfliktit?
Përgjigje: - Them se, të
paktën, kemi një strukturë me të cilën mund të diskutojmë, mbasi më parë nuk dihej
me kë mund të uleshim e të shkëmbenim dy fjalë. Megjithatë, nuk jam i sigurtë në se
kjo strukturë do të jetë pozitive në përpjekjen për paqe. Le të shpresojmë. E të lutemi,
që Zoti t’u japë më shumë urti këtyre njerëzve, që besojnë në gjetjen e rrugës për
të dalë nga tmerri i luftës. Të lutemi, që Zoti t’ua shndrisë mendjet e të kuptojnë
se qetësia e paqja mund të gjinden vetëm me dialog e pajtim. E vetëm me këtë rrugë
mund të lehtësohet edhe vuajtja e një populli të tërë, atij sirian.
Pyetje:
- Duke dhënë njoftimin për misionin tuaj në Liban, Papa i drejtoi bashkësisë ndërkombëtare
një thirrje të fuqishme që të bëjë ç’është e mundur për Sirinë, sepse një ditë, shtoi,
mund të jetë tepër vonë! Besoni se jemi ende në kohë për t’i dhënë fund këtij konflikti
gjakatar? Përgjigje: - Mendoj se bashkësia ndërkombëtare duhet ta dëgjojë
zërin e Atit të Shenjtë e të ulet në tryezën e bisedimeve, të nisë diskutimet për
të gjetur rrugëzgjidhjen e konfliktit, që mund të gjindet, për të rivendosur, kështu,
paqen në Siri. Kjo do të thotë se jo vetëm sirianët, por edhe e gjithë bashkësia ndërkombëtare
është e vendosur ta ndihmojë këtë popull për të rigjetur paqen përmes takimit, diskutimit,
dialogut. Ne të krishterët duhet të lutemi, sepse Zoti ka thënë: “Pa mua s’mund të
bëni asgjë!”. Nuk duhet ta përjashtojmë Zotin nga tryeza e bisedimeve! Prej këndej,
zëri i Atit të Shenjtë, i cili na kujton se duhet të lutemi çdo ditë për Sirinë,
më duket zë, që duhet dëgjuar, e jo vetëm për këtë situatë. E dimë se në botë ka shumë
konflikte të tjera, të mëdha e të vogla. Ka shumë vuajtje. Shumë vdekje. E dimë se
njerëz të veçantë e popullsi të tëra vuajnë në situata nga më të ndryshmet. Besoj,
prandaj, se zëri i Papës duhet dëgjuar në të gjitha situatat e ngatërruara. E edhe
në këtë të krijimit të strukturës së re të opozitës, që mund të hapë rrugën për një
çast dialogu, me ndihmën e bashkësisë ndërkombëtare.