Dhjetë vjet më parë, Gjon Pali II vizitonte Parlamentin italian. Mesazh i Papës Benedikti
XVI: krishterimi, burim i së mirës së përbashkët
Duhet të rinovojmë ftesën për të marrë jetë nga limfa e krishterimit: kështu shkruan
Benedikti XVI në një mesazh, nënshkruar nga Sekretari i Shtetit të Vatikanit, kardinali
Tarçizio Bertone, drejtuar parlamentarëve italianë, që sot kujtuan 10-vjetorin e vizitës
së Gjon Palit II në Pallatin e Monteçitorios. Qe vizita e parë e një pape në
parlament. Ngjarje historike, që forcoi marrëdhëniet ndërmjet Italisë dhe Selisë së
Shenjtë. Në mesazhin e lexuar nga mëkëmbësi i Sekretarisë së Shtetit, imzot Anxhelo
Beçu, Benedikti XVI kujton rrënjët e krishtera, pasurinë shpirtërore të Italisë: “Kjo
pasuri shpirtërore dhe etike mund të ofrojë gjithmonë, edhe në çaste të vështira,
mjete të përshtatshme për risimin e ndërgjegjeve e për orientimin ndaj së mirës së
përbashkët, sidomos nga ana e atyre, që janë të thirrur të bëjnë pjesë në këtë parlament”.