Кардынал Сара: міжнародная супольнасць павінна паслухаць Бэнэдыкта ХVI
Кардынал Робер Сара,
старшыня Папскай рады “Cor Unum”, падзяліўся ўражаннямі ад свайго візіту ў Ліван.
Бэнэдыкт ХVI скіраваў яго ў якасці свайго асабістага пасланніка да сірыйскіх бежанцаў.
Ад імя Пантыфіка іерарх ахвяраваў ім 1 млн. долараў. У інтэрв’ю нашаму радыё кардынал
Сара прызнаўся, што гэта маленькая кропля ў параўнанні з рэальнымі патрэбамі гэтых
людзей. “Я быў вельмі ўражаны, калі ўбачыў жанчыну з чатырохмесячным дзіцём на руках,
якая звярнулася да мяне са словамі “вазьмі яго”, каб выратаваць, - распавёў пасланнік
Папы. Ён таксама распавёў аб іншай мусульманскай жанчыне, якая прасіла дапамогі, і
калі яе атрымала, вельмі плакала. “Я спытаў, чаму плача, а яна адказала мне: Вы паставіліся
да мяне як да чалавека; я нанава адкрыла сваю годнасць, годнасць, якой ніколі не адчувала
ў маёй рэлігійнай супольнасці”. Паводле іерарха, гэта сведчыць аб тым, што нават мусульмане
былі ўражаны тым, як хрысціяне ставяцца да кожнага чалавека ў патрэбе.
Кардынал
Сара заўважыў, што шматлікія сірыйскія ўцекачы вельмі баяцца наплыву ісламскіх фундаменталістаў
у іх краіну. Ён дадаў, што і Каталіцкі Касцёл непакоіцца, што хутка ў рэгіёне не застанецца
ні аднаго хрысціяніна.
Кардынал Сара адзначыў, што калі міжнародная супольнасць
паслухае Бэнэдыкта ХVI і пачне дыялог, тады магчыма будзе знойдзена рашэнне гэтай
цяжкай сітуацыі.