20-я гадавіна дыпламатычных адносін паміж Святым Пасадам і Рэспублікай Беларусь
20 гадоў таму, 11
лістапада 1992 г. былі ўстаноўлены дыпламатычныя адносіны паміж Апостальскай Сталіцай
і Рэспублікай Беларусь. Гэта адбылося ў адпаведнасці з Венскай Канвенцыяй аб дыпламатычных
адносінах і на падставе асаблівага дакумента міжнароднага характару, падпісанага прадстаўнікамі
Святога Пасада і Рэспублікі Беларусь – Пратакола аб устанаўленні дыпламатычных адносін.
Пратакол быў складзены на беларускай і англійскай мове і падпісаны ў Мінску. У ім
адзначаецца, што Святы Пасад і Рэспубліка Беларусь “жадаючы развіваць сувязі ўзаемнай
дружбы і супрацоўніцтва, вырашылі пры сумеснай згодзе ўстанавіць дыпламатычныя адносіны”.
З боку Апостальскай Сталіцы Пратакол быў падпісаны спецыяльным пасланнікам Папы арцыбіскупам
Франчэска Каласуона, а з боку Рэспублікі Беларусь тагачасным міністрам замежных спраў
Пятром Краўчанка. У той жа дзень, 11 лістапада, дакумент уступіў у сілу.
Дыпламатычныя
адносіны паміж Святым Пасадам і Рэспублікай Беларусь былі устаноўлены на вышэйшым
узроўні: з боку Святога Пасаду на ўзроўні Апостальскай нунцыятуры, на чале з Апостальскім
нунцыем, і з боку Рэспублікі Беларусь на ўзроўні пасольства, на чале з Надзвычайным
і Паўнамоцным паслом.