Святы Айцец прызначыў новага сакратара Кангрэгацыі Каталіцкай Адукацыі
Бэнэдыкт XVI прызначыў
новага сакратара Кангрэгацыі Каталіцкай Адукацыі. Ім стаў былы падсакратар гэтай дыкастэрыі,
62-гадовы кс. прэлат Анджэла Вінчэнца Дзані, якому Папа адначасова з прызначэннем
надаў годнасць арцыбіскупа. Новы італьянскі іерарх стаў найбліжэйшым супрацоўнікам
прэфекта Кангрэгацыі, кардынала Зянона Грахалеўскага. Анджэла Вінчэнца Дзані нарадзіўся
каля італьянскага Брэшыа ў 1950 г. У 1975 г. стаў святаром. Пасля вучобы ў трох папскіх
універсітэтах Рыма атрымаў ступень доктара тэалогіі і абараніў ліцэнцыят па грамадскіх
навуках. Выкладаў сацыялогію і сацыялогію рэлігіі ў некалькіх навучальных установах
Брэшыа, прычыніўся да стварэння Вышэйшага інстытуту рэлігійных навук у мясцовым каталіцкім
універсітэце Найсвяцейшага Сэрца.
З 1981 па 1995 гг. Дзані працаваў у біскупскай
курыі, як дырэктар душпастырскага аддзелу, сакратар святарскай і душпастырскай радаў
і кіраўнік аддзелу адукацыі. Затым узначальваў Нацыянальнае бюро па пытаннях адукацыі,
школ і універсітэтаў італьянскага епіскапату.
У 2002 г. стаў падсакратаром
Кангрэгацыі Каталіцкай Адукацыі.