Насычаная праграма Бэнэдыкта XVI у наступныя месяцы
9 лістапада Зала Друку
Апостальскай Сталіцы апублікавала праграму літургічных цэлебрацый, у якіх прыме ўдзел
Святы Айцец у наступныя месяцы. Першым пунктам у ёй значыцца звычайная публічная кансісторыя
24 лістапада, падчас якой Пантыфік уручыць берэты 6 новым кардыналам. 1 снежня адбудуцца
ўрачыстыя нядзельныя Нешпары, падчас якіх Бэнэдыкт XVI будзе маліцца разам з выкладчыкамі
і студэнтамі рымскіх універсітэтаў у ватыканскай базыліцы. 8 снежня, ва ўрачыстасць
Беззаганнага Зачацця, Святы Айцец па-традыцыі ўскладзе вянок на статую Маці Божай
на Іспанскай плошчы італьянскай сталіцы. У Трэцюю нядзелю Адвэнту, 16 снежня, Пантыфік
наведае рымскую парафію св. Патрыцыя, дзе адправіць св. Імшу.
Вечарам 24
снежня Бэнэдыкт XVI узначаліць св. Імшу ва ўрачыстасць Божага Нараджэння, а раніцай
25 снежня скіруе благаслаўленне “Urbi et Orbi” з цэнтральнай лоджыі базылікі св. Пятра.
29 снежня Святы Айцец будзе маліцца разам з удзельнікамі Еўрапейскай сустрэчы
моладзі, якую арганізуе штогод экуменічная супольнасць з Тэзэ. Сёлета яна пройдзе
ў Рыме.
31 снежня вечарам Папа ўзначаліць Нешпары ўрачыстасці Святой Багародзіцы
Марыі, а ў сам дзень урачыстасці, 1 студзеня 2013 г., адправіць св. Імшу ў базыліцы
св. Пятра. 6 студзеня, ва ўрачыстасць Аб’яўлення Пана, Бэнэдыкт XVI узначаліць Эўхарыстыю
ў ватыканскай базыліцы. 10 студзеня, ва ўрачыстасць Хросту Пана, Святы Айцец удзеліць
у Сікстынскай капэле сакрамэнт хросту некалькім дзецям.
25 студзеня, Пантыфік
накіруецца ў рымскую базыліку св. Паўла за Мурамі, дзе будзе ўдзельнічаць у Нешпарах
на заканчэнне Тыдня малітваў за адзінства хрысціянаў.