Сапраўдная
мэта энтузіястаў экуменізму – адзінства ў веры, сакрамэнтах і літургіі – да гэтага
часу яшчэ не дасягнута. “Зараз экуменічны рух перажывае крызіс”, - сказаў кардынал
Курт Кох, старшыня Папскай рады спрыяння хрысціянскаму адзінству. 8 лістапада іерарх
прыняў удзел у сустрэчы, арганізаванай рухам Факаляраў у швейцарскім Берне. “Надзея,
якая нарадзілася падчас ІІ Ватыканскага Сабору, аб тым, што экуменічнае адзінства
сярод хрысціян будзе дасягнута хутка, не ажыццявілася”, - адзначыў старшыня ватыканскай
дыкастэрыі. На думку кардынала Коха, у апошнія дзесяцігоддзі сітуацыя наадварот ускладнілася,
мэта экуменічнага руху стала ўсё больш нявызначанай. “Да гэтага часу мы не заключылі
ніякага трывалага пагаднення”, - сказаў іерарх. Ён падкрэсліў, што, магчыма, “мы ішлі
шляхамі, скіраванымі ў розныя напрамкі, і ў канцы канцоў яшчэ больш аддаліліся ад
сябе”. “Было б важна, каб у канчатковым выніку мы дайшлі да згоды ў рэалізацыі нашай
мэты”, - падкрэсліў кардынал Кох.