У Ватыкане адбудзецца Кангрэс душпастырства працуючых на моры
У Ватыкане адбудзецца
ХХІІІ Сусветны кангрэс душпастырства працуючых на моры. Ён пройдзе 19-23 лістапада
і будзе прысвечаны новай евангелізацыі ў гэтай сферы. Кардынал Антоніа Марыя Вэльё,
старшыня Папскай рады пастырства эмігрантаў і падарожнікаў, паведаміў, што зараз у
свеце існуе 110 цэнтраў “Stella Maris”, якія займаюцца духоўнай і матэрыяльнай дапамогай
маракам. А іх у свеце налічваецца каля 40 млн.
Кангрэс абмяркуе ўсе аспекты,
звязаныя з пагрозамі для “марскога свету”, - сказаў кардынал Вэльё. У форуме прыме
ўдзел 410 асоб з 71 краіны свету, якія ў гэтым годзе абмяркуюць асаблівым чынам праблему
пірацтва. Яно з’яўляецца сапраўдным выклікам і пагрозай для працаўнікоў мора і прыносіць
кожны год страты ў памеры 10-15 млрд. долараў. Таму ўдзельнікі асамблеі абмяркуюць
ініцыятывы, звязаныя з аховай працуючых на моры. 23 лістапада ўдзельнікі Кангрэса
сустрэнуцца з Бэнэдыктам ХVI.