Бэнэдыкт XVI: навука паступова адкрывае, што свет паўстаў не з хаоса
Бэнэдыкт XVI прыняў
8 лістапада ўдзельнікаў пленарнага пасяджэння Папскай акадэміі навук, якая 5-7 лістапада
прайшла ў Ватыкане на тэму “Складанасці і аналогіі ў навуцы: тэарытычныя, метадалагічныя
і эпістэмалагічныя аспекты”. Выбар гэтай тэмы не выпадковы: на працягу апошніх дзесяцігодзяў
былі зроблены шматлікія навуковыя адкрыцці ў розных галінах, але многіх навукоўцаў
іх вынікі не задавальняюць, бо часта бываюць аднабаковымі і не знаходзяць пацвярджэння
ў больш шырокай і складанай рэальнасці прыроды. У сувязі з гэтым, Папа звярнуў увагу
на вялікія гарызонты, якія стаяць перад сучаснай навукай і патрабуюць узаемадзеяння
паміж яе рознымі галінамі. “Сапраўды, важныя адкрыцці і дасягненні апошніх гадоў запрашаюць
нас да адшукання глыбейшай аналогіі паміж фізікай і біялогіяй, якая выразна праяўляецца
кожны раз, калі мы дасягаем больш глыбокага разумення натуральнага парадку”, - адзначыў
Папа.
Паводле Святога Айца, міждысцыплінарны падыход да складанасцяў, паказвае,
што “навука – гэта інтэлектуальныя светы не абасобленыя адзін ад аднаго, а ўзаемазвязаныя
паміж сабой і накіраваныя на вывучэнне прыроды, як адзінай, зразумелай і гарманічнай
рэальнасці ў яе несумненнай складанасці”. Пантыфік нагадаў, што такое бачанне свету
супадае з поглядамі хрысціянскай філасофіі і тэалогіі.
Бэнэдыкт XVI падкрэсліў,
што сусвет не з’яўляецца хаосам і не ўзнік з яго, і менавіта гэта паступова адкрывае
навука, вывучаючы заканамернасці і прыродны парадак. Паводле Святога Айца, гэта яшчэ
раз падцвярджае, што для адкрыцця таямніцы чалавека і сусвету неабходны дыялог і
супрацоўніцтва паміж навукай і верай.