Папа заклікаў да міру ў Сірыі і скіраваў свайго спецыяльнага пасланніка
Святы Айцец паведаміў
7 лістапада падчас агульнай аўдыенцыі, што “па-ранейшаму з вялікай заклапочанасцю”
сочыць за трагічнай сітуацыяй вакол канфлікту ў Сірыі, “дзе баявыя дзеянні не спыняюцца
і з кожным днём колькасць ахвяр расце, што суправаджаецца невымоўнымі пакутамі шматлікіх
грамадзянскіх асоб, асабліва тых, якія былі вымушаныя пакінуць свае дамы”. Папа нагадаў,
што ў “знак уласнай салідарнасці і салідарнасці ўсяго Касцёла з сірыйскім народам”
хацеў адправіць дэлегацыю Сінадальных айцоў у Дамаск. “На жаль, з-за розных абставінаў
і падзей, не ўдалося ажыццявіць гэтую ініцыятыву, як планавалася, і таму я вырашыў
даручыць спецыяльную місію кардыналу Роберу Сара, старшыні Папскай рады “Cor Unum”,
- паведаміў Пантыфік і дадаў, што “з сённяшняга дня да 10 лістапада ён будзе знаходзіцца
ў Ліване, дзе сустрэнецца з пастырамі і вернікамі Цэркваў, прысутных у Сірыі. Ён наведае
шматлікіх бежанцаў з гэтай краіны і правядзе нараду каталіцкіх дабрачынных устаноў,
якіх Святы Пасад настойліва прасіў аказаць дапамогу сірыйскаму народу, у межах і за
межамі краіны для каардынацыі намаганняў”.
Бэнэдыкт XVI запэўніў у сваё малітве
і чарговы раз запрасіў канфліктуючыя бакі “не шкадаваць намаганняў у пошуках міру”
і “шляхоў да справядлівага суіснавання”. “Ніколі не позна, працаваць на карысць міру!”,
- адзначыў Святы Айцец.