Shpata e përkrenarja e Skënderbeut më 28 nëntor në Shqipëri
Pritet të sjellët në Tiranë shpata e përkrenares së heroit kombëtar, Gjergj Kastrioti
Skënderbeu, me rastin e Jubileut të 100-vjetorit të Pavarësisë së Shqipërisë. Data
e saktë nuk është përcaktuar ende, por, sipas të gjithave gjasave, ato do të jenë
në Muzeun Kombëtar të Tiranës më 28 nëntor. Drejtori i këtij institucioni, Luan
Malltezi, ka zbuluar disa nga detajet e ekspozimit të tyre. Sipas tij, shqetësimi
dhe interesimi më i madh i palës austriake, përkatësisht Kunsthistorisches Museum
ka qenë siguria, dhe gjatë këtyre muajve janë bërë inspektime të njëpasnjëshme në
mjediset e Muzeut. "Krahas vendosjes ato kanë edhe kërkesa të tjera. Një nga këto
është dhe sa të garantuara janë ato në Shqipëri. Muzeu Historik Kombëtar realizon
kushtet e ruajtjes. Ne kemi nën vëzhgim Muzeun Historik me një shërbim 24 orë nga
organet e rendit. Vetë çdo ambient i Muzeut është i vëzhguar me kamera, kemi inspektorë
të sallave", citon AS Malltezin. Menaxhimi i fluksit të vizitorëve mbetet gjithashtu
një nga problemet e muzeut, ndërsa nuk është përcaktuar nëse hyrja do të jetë falas
apo me biletë. "Për të parë objektet e Skënderbeut do vihet në lëvizje e tërë shoqëria
shqiptare dhe ky është një shqetësim i madh për ne, në kuptimin që do të kemi një
dyndje të madhe të njerëzve në Muze. Është menduar edhe për çështjen e biletës. Ne
dëshirojmë që njerëzit të vijnë, por jemi të interesuar që vizita në muze të jetë
e rregullt. Muzeu të mos jetë në situatë të vështirë nga pjesëmarrja e vizitorëve",-
tha Malltezi Për herë të parë pasi janë larguar nga Shqipëria në vitin 1468 kur
vdiq Gjergj Kastrioti Skënderbeu, arma dhe përkrenarja do të ekspozohen në pavionin
e Mesjetës. Ekspozimi do të shoqërohet gjatë gjithë kohës nga trupat e gardës së Republikës.