Ndërmjet Obamës e Romnejt, sfidë për vendet e punës
Të dhënat e fundit mbi ekonominë amerikane, që u bënë të njohura javën e kaluar, në
prag të zgjedhjeve presidenciale të 6 nëntorit, janë të favorshme për presidentin
Barak Obama dhe e ndihmojnë në sfidën me republikanin Mit Romnej. Në tetor, papunësia
mbeti rreth shifrës 8%, megjithëse pak më e rritur në krahasim me shtatorin. Por vendet
e reja të punës arrijnë shifrën 171 mijë, 50 mijë më shumë nga sa pritej. Kështu,
Obama mundi të brohorasë: “Ekonomia po bën përparime të vërteta”. Rreziku që të fundosej
pikërisht para zgjedhjeve, ishte i madh, por tani, edhe pas rezultateve të mira në
përballimin e uraganit “Sandy”, Barak Obama, presidenti i parë amerikan me origjinë
afrikane, mund të shpresojë të rizgjidhet. Por Mit Romnej nuk ka ndërmend të tërhiqet.
Ekonomia ndodhet në një pikë të vdekur, bubulloi përfaqësuesi i republikanëve, i cili
vuri në shënjestër presidentin aktual: “Nuk e ka kuptuar kurrë si krijohen vendet
e punës. Me katër vjet të tjera të Barak Obamës në Shtëpinë e Bardhë rrezikojmë të
kthehemi sërish mbrapa”. Ish-guvernatori i Masaçusets, me përvojë afaristi, premton
t’i ndihmojë amerikanët të rifitojnë punën e humbur. Objektivi i tij ambicioz është
krijimi i 12 milion vendeve të reja të punës gjatë katër viteve të ardhshme, pra,
2.500 në muaj. U drejtohet zgjedhësve të Uiskonsinit e të Ohajos, ku, për shkak të
fabrikave, punëtorët janë në numër të madh. E di mirë se askush nuk fiton pa votat
e Ohajos. E sondazhet e fundit tregojnë se pikërisht në këtë shtet, Obama ka dy pikë
më shumë se kundërshtari i tij, falë shpëtimit të industrisë automobilistike. Po kështu,
edhe në Florida, ndërsa distanca nga Romnej në Virgjinia arrin në tri pikë. Në nivel
kombëtar, ndryshimi ndërmjet dy kandidatëve për president është i papërfillshëm. Pasiguria
është e madhe e gjithçka vendoset nesër.