Հաւատքին կենսականութիւնը Կիրակի 14 հոկտեմբեր 2011-ին, Պենետիկտոս ԺԶրդ Սրբազան
Քահանայապետը, Սուրբ Պետրոս Տաճարին մէջ գլխաւորած սուրբ Պատարագի ընթացքին, Վատիկանեան
տիեզերական Բ. ժողովի 50րդ տարեդարձի առթիւ առաքելական պաշտօնական գիրով հռչակեց բացումը
''Հաւատոյ Տարի''-ին, որ կը սկսի 11 հոկտեմբեր 2012ին եւ կ՛եզրափակուի 24 նոյեմբեր 2013՝
«Քրիստոս տիեզերքի Թագաւոր» տօնին օրը: Մեծապէս համոզուած ենք որ «Հաւատոյ Տարի»ն
պիտի նպաստէ հաւատացեալներու հոգիները սնուցանելու՝ Քրիստոնէական հաւատքի վարդապետութեան
մասին պատրաստուած խորհրդածութիւններով, որոնք կը սփռուին ամէն ուրբաթ օր Վատիկանի ձայնասփիւռէն:
Ս. Գիրքին մէջ, «Հաւատք» բառը բազմաթիւ իմաստներ ունի: Սակայն անոր գլխաւոր իմաստը
հետեւեալն է. Առաքինութիւն մը, որով կատարեալ եւ ամբողջական կերպով կը հաւանինք Աստուծոյ
կողմէ յայտնուած ճշմարտութիւններուն: Ոչ ոք կրնայ իրաւացիօրէն տարակուսիլ, թէ այս հաւատքը
որուն մասին կը խօսինք եւ պիտի խօսինք այս տարուոյն ընթացքին, հարկաւոր է փրկութեան,
որովհետեւ Եբրայեցիներուն թուղթին մէջ գրուած է. «Առանց հաւատքի անկարելի է Աստուծոյ
հաճելի ըլլալ» (Եբր. ԺԱ, 6) Աստուած մեզ շատ մը բաներ յայտնած է: Եւ ամէն ինչ որ յայտնուած
է, դիւրաւ չի հասկցուիր, եւ նոյնիսկ երբ զայն հասկցած ենք, բաւականաչափ լաւ չենք պահեր
մեր մտքին մէջ, որպէսզի կարենանք միշտ գոհացուցիչ բացատրութիւն մը ընձեռնել: Այս պատճառով,
շատ իմաստուն կերպով մեր Հայրերը՝ փրկութեան վարդապետութիւնը եւ գիտութիւնը բաժնած են
զանազան գլխաւոր մասերու. Առաքեալներու Հանգանակը, խորհուրդները, տասը պատուիրանները
կամ՝ Տասնաբանեան եւ Տէրունական Աղօթքը: Արդ ամէն ինչ որուն պէտք է հաւատանք եւ զոր
պէտք է ճանչնանք Աստուծոյ մասին, այսինքն ստեղծագործութիւնը, աշխարհիս կառավարութիւնը,
բարիներու վարձատրութիւնը եւ չարերու պատիժը, այս բոլորը բովանդակուած են մեր Հաւատոյ
Հանգանակին մէջ: Հաւատքը ներգործութիւն մըն է, որ փոփոխութիւն մը կը նշէ, զղջում
ու դարձ մը, ինչպէս կ՛ըսէ Պենետիկտոս Քահանայապետը: Այս ներգործութիւնը սակայն կղզիացած
խորհրդածութեան արտացոլումը չէ այլ պտուղն է Յիսուսի հետ երկխօսութեան յարաբերութեան:
Հետեւաբար, մարդուս վերջին վախճանը, այսինքն՝ երջանկութիւնը զոր պէտք է փնտռէ, չափազանց
բարձր է, որպէսզի կարող ըլլայ իր բնական խելքով զայն ճանչնալ: Հարկ է ուրեմն որ Աստուած
զայն անձամբ ծանօթացնէր իրեն: Արդ, այս ծանօթութիւնը ուրիշ բան չէ եթէ ոչ Հաւատքը,
որով, բոլորովին անվարան կ՛ընդունինք իբրեւ ստոյգ՝ ինչ որ մեր Մայրը՝ Ս. Եկեղեցին մեզի
կը սորվեցնէ իբրեւ յայտնուած՝ Աստուծոյ կողմէ: Որովհետեւ ինչպէս կ՛ըսէ Սուրբ Կիպրիանոս.
« Ոչ մէկը կրնայ ըսել որ Աստուած Հայր է եթէ չ՛ունի Եկեղեցին որպէս Մայր»: Հետեւաբար,
ի սկզբանէ եկեղեցին եղած է հաւատքի ու անոր փոխանցման վայր. Վայրը ուր մկրտեալը մխրճուած
է Քրիստոսի Զատկական խորհուրդի մէջ որ զինք կ՛առաջնորդէ հաղորդութեան մէջ մտնելու` Սուրբ
Երրորդութեան հետ ու հաւատքով իր եղբայրներուն ու քոյրերուն հետ։ Ստոյգ է որ Հաւատքը
ունի աստիճաններ ընդարձակութեան եւ պատուականութեան տեսակէտներէն, ինչպէս կ՛երեւի Ս.
Գիրքի հետեւեալ կէտերէն. «Տկար հաւատքի տէր մարդ, ինչո՞ւ տարակուսեցար», կամ ալ «Մեծ
է քու հաւատքդ», ինչպէս նաեւ «Աւելցուր մեր հաւատքը»: Սակայն հաւատքը մէկ տեսակ է, եւ
որ աստիճանի որ ըլլայ, անոր կը յարմարի միեւնոյն սահմանը: Գալով անոր արտադրած պտուղներուն
եւ ընձեռած առաւելութիւններու, պիտի խօսնինք յաջորդ սփռումներուն մէջ: