"ԾԻՐԱՆԻ ԳՕՏԻ " ծրագիրը (Պէյրութ) ։ Յայտարարութիւն Հայ Կաթողիկէ Պատրիարքարանի ՝՝Սուրբ
Գրիգոր Նարեկացի՝՝ Կեդրոնէն։
Արուեստի դասընթացքներու եւ մարզական ժամանցի ծրագիր` Լիբանան ապաստանած սուրիահայ մանուկներու
եւ երիտասարդներու համար: Այսու կը յայտարարենք, որ Հայ կաթողիկէ Պատրիարքարանի «Սուրբ
Գրիգոր Նարեկացի» կեդրոնը Սուրիայէն պարտադրաբար Լիբանան ապաստանած ընտանիքներու մանուկներուն
եւ երիտասարդներուն համար կը հաստատէ գեղարուեստի դասընթացքներու եւ մարզական ժամանցի
«Ծիրանի Գօտի» ծրագիրը` նպաստելու համար ծանօթ պատճառներով լարուածութեան մէջ գտնուող
անոնց բարոյահոգեբանական վիճակի կազդուրման: «Ծիրանի Գօտի-»ն կ՛ընդգրկէ լեզուներու,
լուսանկարչութեան եւ նկարչութեան դասընթացքներ, հեքիաթի պատումի ժամ եւ մարզական խաղեր: Դասընթացքներն
ու մարզական խաղերը տեղի պիտի ունենան շաբաթ օրերը, ՀԿՄ-ի Էշրեֆիէի կեդրոնին մէջ: Անոնք
ձրի են: Արձանագրութեանց եւ յաւելեալ տեղեկութիւններու համար ծնողները կրնան դիմել
Դպրոցական հայագիտութեան զարգացման գրասենեակ, հեռաձայն` 01 570 559, 70 857 427, առաւօտեան
ժամը 9:30-էն մինչեւ կէսօրէ ետք ժամը 4:00: Այս ծրագիրով սուրիահայ ընտանիքներուն
եւ մանուկներուն կը մեկնենք աջակցութեան ձեռք, որուն կարիքը հիմա ունին անոնք: Այդպիսով
կը յուսանք նաեւ հոգեւոր եւ ազգային պարտք մը կատարած ըլլալ` տագնապալի ժամանակներէ անցնող
մեր հայրենակիցներուն նկատմամբ: Հայ կաթողիկէ պատրիարքարանի «Սուրբ Գրիգոր Նարեկացի»
կեդրոն, Լիբանան: