Papa: në shenjtorët shohim fitoren e dashurisë mbi egoizmin dhe vdekjen
“Në shenjtorët shohim fitoren e dashurisë mbi egoizmin e mbi vdekjen: shohim faktin
që të ndjekësh Krishtin të çon në jetë, në jetën e amshuar, e të shkosh pas Krishtit
i jep kuptim të sotmes dhe çdo çasti që kalon, sepse e përmbush me dashuri e shpresë”.
Kështu tha sot Papa Benedikti XVI gjatë lutjes së Engjëllit të Tënzot në Sheshin e
Shën Pjetrit në Vatikan në festën e sotme të të Gjithë Shenjtorëve, të cilët Kisha
i kremton sot më 1 nëntor. “Vetëm feja në jetën e amshuar – shtoi Papa Ratcinger
– na bënë ta duam më të vërtetë historinë dhe të sotmen, por pa u lidhur në mënyrë
të përhershme, me lirinë e shtegtarit, që e do tokën pse e ka zemrën në Qiell”. Sot,
vijoi Ati i Shenjtë Jozef Ratcinger, “kemi gëzimin të kremtojmë solemnitetin e të
Gjithë Shenjtorëve, kjo festë “na bënë të reflektojmë mbi horizontin e dyfishtë të
njerëzimit, që simbolikisht shprehet me fjalët ‘tokë’ dhe ‘qiell’: toka përfaqëson
udhëtimin historic, qielli amshimin, plotësinë e jetës në Zotin. E kështu kjo festë
na bënë të mendojmë për Kishën në përmasën e saj të dyfishtë: Kishën që udhëton në
kohë dhe atë që kremton festën e pambarim, Jerusalemin qiellor. Këto përmasa të dyfishta
janë të bashkuara nga realiteti i ‘ bashkësisë së shenjtorëve’: një realitet ky që
fillon këtu mbi tokë e arrin plotësimin e vet në Qiell. Në botën tokësore, Kisha është
fillimi i këtij misteri të bashkimit që njëson njerëzimin, në misterin e plotë të
përqendruar e të mbështetut në Jezu Krishtin: është Ai që e ka shtie në gjininë njerëzore
këtë dinamikë të re, këtë lëvizje që na shpie drejt Zotit e në të njëjtën kohë drejt
vet bashkimit, drejt paqes në kuptimin më të thellë të fjalës”.