Бэнэдыкт ХVI скіраваў пасланне на Сусветны дзень мігранта і бежанца
“Міграцыя: пілігрымка
веры і надзеі”, - так гучыць тэма, якую Бэнэдыкт ХVI абраў на 99-ы Сусветны дзень
мігрантаў і бежанцаў, які Касцёл адзначыць 13 студзеня 2013 г. У сваім пасланні, апублікаваным
29 кастрычніка, Святы Айцец адзначае, што зараз у свеце мільёны мужчын і жанчын “жывуць
досведам эміграцыі”. “Гэта з’ява ўражвае колькасцю асоб ахопленых ёй і прынесенымі
сацыяльнымі, эканамічнымі, палітычнымі, культурнымі i рэлігійнымі выклікамі”, - напісаў
Папа. Ён нагадаў, што кожны эмігрант – гэта асоба, маючая неад’емныя фундаментальныя
правы, якія павінны паважацца ўсімі. Пантыфік падкрэсліў, што эмігрант – гэта часта
чалавек, які мае глыбокі давер да Бога, што дазваляе яму перамагаць цяжкасці на сваім
шляху. Касцёл, паводле яго, пакліканы спрыяць інтэграцыі такіх асоб ў грамадствы краін,
куды яны прыбываюць.
На думку Бэнэдыкта ХVI, не ўсе эмігранты шукаюць выключна
паляпшэння сваёй эканамічнай, грамадскай і палітычнай сітуацыі. Часта прычынай бегства
з Радзімы з’яўляюцца пераслед і насілле. “Эмігранты заўсёды маюць надзею на тое, што
будуць прынятыя, атрымаюць сапраўдную дапамогу і зразуменне сваіх цяжкксцяў і трагедыі”,
- напісаў Папа. “Эмігранты і бежанцы, - падкрэсліў Пантыфік, - праз атрыманую гасціннасць
могуць унесці свой ўклад у пабудову дабрабыту краін, куды прыбылі”. Папа нагадаў,
што кожная краіна мае права рэгуляваць працэсы эміграцыі. Аднак, не трэба забывацца,
што права на міграцыю ўпісана ў асноўныя правы чалавека, што дазваляе кожнаму пасяліцца
там, дзе ён можа рэалізаваць свае здольнасці, памкненні і планы.
Тым не менш,
паводле Папы, спачатку кожнаму чалавеку трэба даць права застацца ў сваёй краіне.
Менавіта таму эміграцыя сёння замест таго, каб стаць “пілігрымкай даверу”, ператвараецца
ў “галгофу цярпення”. Тут Пантыфік узгадаў тых эмігрантаў, якія жывуць ва ўмовах адчужэння,
эксплуатацыі, пазбаўленыя асноўных правоў. У гэтым кантэксце Бэнэдыкт ХVI звярнуў
увагу на праблему нелегальнай эміграцыі, асабліва такой яе формы, як гандаль людзьмі
і эксплуатацыя. “Гэтыя злачынствы павінны рашуча асуджацца і карацца”, - падкрэсліў
Папа. У сваім пасланні Святы Айцец выступіў з крытыкай замыкання краінамі сваіх межаў
і жорсткае ўзмацненне санкцый адносна нелегальных эмігрантаў. Паводле яго, гэтыя
інструменты ніколі не будуць эфектыўнымі. У завяршэнне Пантыфік заклікаў касцёльныя
ўстановы і дзяржаўныя органы наладжваць супрацоўніцтва на карысць дапамогі эмігрантам.