«Սուրիոյ Մէջ Կացութիւնը Անելի Մատնուած Է»Կ՝ըսէ Ալեքսէյ Փուշքով։
Ռուսիոյ Տումայի արտաքին յարաբերութեանց յանձնախումբի նախագահ Ալեքսէյ Փուշքով յայտարարեց,
որ «Սուրիոյ մէջ կացութիւնը անելի մատնուած է»` նշելով, որ «աշխարհի երկիրները պէտք է
գիտակցին, որ սուրիական տագնապը կարելի չէ ընդդիմութիւնը զինելու ճամբով լուծել»: Փուշքով
«Ռաշա Թուտէյ»-ի հետ հարցազրոյցի մը ընթացքին Միացեալ Նահանգները ամբաստանեց «Սուրիոյ
մէջ ներկայ քաոսը տարածելու յանցանքով»: Սուրիոյ արտաքին գործոց նախարարութեան բանբեր
Ժիհատ Մաքտիսի ԱՖՓ լրատու գործակալութեան ուղղուած ե-նամակի մը մէջ յայտնեց, որ Դամասկոս
ընդդիմադիր զինեալ խմբաւորումներուն խախտումները ցանկագրելով ՄԱԿ-ի Ապահովութեան խորհուրդին
ուղարկած է` վստահեցնելով, որ Սուրիոյ բանակը զինուորական գործողութիւնները կասեցուցած
է: Մաքտիսի ըսաւ, որ «սուրիական կառավարութիւնը կատարելապէս յանձնառու է զինուորական
գործողութեանց դադրեցման, ինչպէս նշուած է բանակի եւ զինեալ ուժերու սպայակոյտի հաղորդագրութեան
մէջ, սակայն (զինադադարի) խզումները մեծամասնութեամբ կատարուեցան այն խմբաւորումներուն
կողմէ, որոնք ի սկզբանէ մերժեցին զինադադարը, ինչպէս կը վկայեն անոնց հրապարակած պաշտօնական
հաղորդագրութիւնները»: Մարդկային իրաւանց հսկող սուրիական մարմինը հաղորդեց, որ սուրիական
ընդդիմութեան եւ քիւրտերուն միջեւ Հալէպի Աշրաֆիեէ թաղամասին մէջ տեղի ունեցած բախումներուն
ընթացքին գերեվարուած 120 քիւրտեր ազատ արձակուած են: Մինչ այդ, Իրաք երէկ Սուրիա
ուղղուող իրանեան օդանաւի մը ստիպեց խուզարկութեան համար էջք կատարել Պաղտատ: Օդանաւը,
որ մարդասիրական օժանդակութիւն կը փոխադրէր, հետագային շարունակեց իր թռիչքը: Նշենք,
որ ասիկա երկրորդ անգամն է, որ Իրաք իրանեան օդանաւ մը կը խուզարկէ: