Հայ Առաքելական Եկեղեցւոյ Երուսաղէմի Պատրիարքը Պիտի Ընտրուի Նոյեմբերին.
Հայ Առաքելական Եկեղեցւոյ ԱՄՆ Արեւելեան թեմի առաջնորդ Խաժակ Արքեպիսկոպոս Պարսամեանի՝
Երուսաղէմի պատրիարք դառնալուն հարցը տակաւին յստակ չէ: Խաժակ սրբազանը Երուսաղէմի հայոց
պատրիարք ընտրուելու համար, նախ ընտրող ժողովի մասնակիցները պէտք է քուէարկեն անոր օգտին,
ապա ինք անձամբ պէտք է փափաքի պատրիարք դառնալ: Այս մասին յայտնած է Երուսաղէմի հայոց
պատրիարքի տեղապահ Արիս արքեպիսկոպոս Շիրվանեանը՝ ըստ «Արմէնփրէս»լրատու գործակալութեան
: «Հանգուցեալ պատրիարքին յուղարկաւորութիւնը կատարուեցաւ եւ մահէն 40 օր ետք, երբ
քառասունքը կը լրանայ, նոր պատրիարքի ընտրութիւնը կը սկսի: Դժուար է ըսել, թէ ո՛վ պիտի
դառնայ պատրիարք, որովհետեւ թեկնածութիւններ չեն յայտարարուած տակաւին: Տեղի կ՛ունենայ
ժողով մը, որուն ընթացքին գաղտնի քուէարկութիւն կը կատարուի եւ հինգ թեկնածուի անուններ
կ՛ընդգրկուին, ապա երկրորդ քուէարկութեամբ՝ 5էն մէկը կը դառնայ պատրիարք»( ըսած է Արիս
արք. Շիրվանեան) :
Երուսաղէմի մէջ Հոկտեմբեր 12ին վախճանեցաւ Երուսաղէմի հայոց
պատրիարք՝ ամենապատիւ Տ. Թորգոմ արքեպիսկոպոս Մանուկեանը: 93ամեայ պատրիարքը 60 տարի
նուիրումով ծառայած էր հայ եկեղեցւոյ: Ան նաեւ եղած էր «Սիոն» պաշտօնաթերթի խմբագրական
կազմի անդամ, Ճեմարանի փոխտեսուչ եւ տեսուչ: Մանուկեան ծառայած էր ԱՄՆի մէջ՝ Քրիստոսի
եկեղեցիներու ազգային ժողովի յանձնաժողովին մէջ, նախագահած էր «Կրօնը ամերիկեան կեանքին
մէջ» խորհուրդին: Ան եղած էր նաեւ «Խղճմտանքի կոչ» անուան հիմնադրամի տնօրէններու խորհուրդի
անդամ: