Votohet Mesazhi përfundimtar i Sinodit të ipeshkvijve: ungjillëzimi i ri është urgjenca
e botës.
Me një duartrokitje të ngrohtë, të stuhishme: kështu e priti sot Sinodi i ipeshkvijve
kushtuar ungjillëzimit të ri “Mesazhin drejtuar popullit të Zotit”, që përmbledh
punimet e takimit të madh kishtar. Dokumenti u lexua në pesë gjuhët kryesore të botës:
italisht, frëngjisht, spanjisht, anglisht e gjermanisht, në praninë e Papës Benedikti
XVI. Teksti ripohon se bota ka nevojë urgjente për ungjillëzimin e ri dhe i fton të
krishterët ta kumtojnë Ungjillin paqësisht, por me guxim, duke e mundur frikën me
fe.
Flitet për popullin e Zotit, në përmbledhjen e mesazhit. E populli i Zotit,
shpesh i çkujdesur e konfuz, i rrezikuar nga zhgënjime shkatrrimtare, përshkruhet
si samaritania pranë pusit, sipas rrëfimit të Shën Gjonit në Ungjillin e tij: me kovë
bosh! Me etje e mall për Zotin. Me të duhet të takohet Kisha, që ta ndihmojë për ta
parë përsëri Jezusin. E ashtu si samaritania - nënvizon mesazhi i Sinodit - që takohet
me Zotin, nuk mund të mos bëhet dëshmitar i kumtimit të shëlbimit dhe i shpresës së
Ungjillit. Të merret, pra, për dore bota bashkëkohore e të çohet kah Jezusi, kjo është
urgjenca më e madhe e kohëve të reja.
Gjithsesi Kisha ripohon se që të mund
të ungjillëzojmë duhet, në radhë të parë, të ungjillëzohemi dhe bën thirrje - duke
nisur nga vetvetja - për kthesë shpirtërore, duke pasur mirë parasysh se ligështitë
e mëkatet personale të dishepujve të Krishtit peshojnë rëndë mbi besueshmërinë e misionit.
Por, e pavarësisht nga ligështitë, të krishterët duhet ta mposhtin frikën me fe e
ta shikojnë botën me guxim të qetë sepse, pavarësisht nga kundërshtitë, ajo mbetet
gjithnjë bota, që Zoti e do.
Larg çdo pesimizmi, prandaj! Globalizimi, shekullarizimi,
emigrimi, ateizmi, kriza e hegjemonisë së politikës e të Shtetit, pavarësisht nga
vështirësitë e vuajtjet, që shkaktojnë, duhen parë si mundësi për të ungjillëzuar.
E këtu nuk bëhet fjalë për të gjetur strategji të reja të përhapjes së Ungjillit,
si të ishte mall tregu, por për të rizbuluar rrugë të reja, që i çojnë njerëzit tek
Krishti.
Prej këndej, mesazhi thekson se familja është vatra kryesore e ungjillëzimit
dhe ripohon se ajo duhet ndihmuar fuqimisht nga Kisha, nga politika, nga shoqëria.
E, në gjirin e familjes, nënvizohet roli i posaçëm i nënave, përgjegjësia e etërve,
gjendja e dhimbshme e njerëzve, që bashkëjetojnë pa kurorë, e të divocuarve dhe e
të rimartuarve e, edhe pse ripohohet disiplina lidhur me marrjen e sakramenteve, kujtohet
se ata nuk janë njerëz të braktisur nga Zoti e se Kisha është shtëpi me porta të hapura
për të gjithë.
Në dokumentin sinodal vihet fort theksi edhe mbi famullitë,
parë si qendra të domosdoshme të ungjillëzimit. Kujtohet rëndësia e jetës rregulltare
dhe e formimit të përhershëm të priftërinjve dhe rregulltarëve; ftohen shekullarët
ta kumtojnë Ungjillin në bashkim me Kishën. Vëmendje e dorës së parë u kushtohet të
rinjve, e sotmja dhe e ardhmja e njerëzimit dhe e Kishës, duke i parë në perspektivën
e dëgjimit e të dialogut, për ta ndezur e jo për ta shuar, entuziazmin e tyre.
Ungjillëzimi
i ri ka horizonte të gjëra, sa vetë bota, thuhet në Sinod, prej këndej, është themelor
dialogu, në mënyra e fusha të ndryshme: me kulturën, për lidhjen e një bese të re
ndërmjet fesë e arsyes; me arsimin, për formimin e gjithanshëm të njeriut; me komunikimet
shoqërore, mjedise ku shpesh formohen vetëdijet, e mjete, që krijojnë mundësi të reja
për të fituar zemrën e njeriut; me shkencën që, kur nuk e mbyll njeriun në kullën
e hekurt të materializmit, bëhet aleate e fuqishme në përpjekjen e madhe për ta bërë
njeriun më njerëzor.
E akoma: qëndror, dialogu me artin, që hyn në shpirtin
e njeriut, përmes krijimit të bukurisë; me botën e ekonomisë e të punës, që kjo e
fundit të mos bëhet kurrë barrë e padurueshme e as perspektivë e paqartë, por t’i
hapë rrugë zhvillimit njerëzor; me politikën, nga e cila kërkohet kujdes pa interes
e transparent në shërbim të së mirës së përbashkët, duke respektuar dinjitetin e njeriut,
të familjes së bazuar mbi martesën e një burri me një grua, të lirisë edukative e
fetare, të përpjekjes për zhdukjen e shkaqeve të padrejtësive e të pabarazive. Themelor,
pastaj, edhe dialogu ndërfetar, që jep një ndihmesë të çmuar për paqen, i kundërvihet
fondamentalizmit dhe dënon dhunën kundër besimtarëve, duke e parë si shkelje të rëndë
të të drejtave të njeriut.
Dy shprehje të jetës së fesë janë posaçërisht domethënëse
për ungjillëzimin e ri: kundrimi, gjatë të cilit heshtja krijon kushte për ta dëgjuar
më mirë fjalën e Zotit, e shërbimi ndaj të varfërve, duke parë Krishtin në fytyrën
e tyre.
Në pjesën e fundit, mesazhi shikon Kishat e zonave të ndryshme të botës
dhe secilës prej tyre i drejton fjalë inkurajimi për kumtimin e Ungjillit: Kishave
të Lindjes u uron ta praktikojnë fenë në kushte paqeje e lirie fetare. Kishave
të Afrikës, të ungjillëzojnë duke pasur parasysh takimin e kulturave të lashta
me ato të reja e duke u drejtuar qeverive thirrjen t’i japin fund konflikteve e dhunës. Të
krishterët e Amerikës së Veriut, që jetojnë në gjirin e një kulture me shumë
tipare larg Ungjillit, duhet ta vënë theksin mbi kthimin në rrugën e Zotit, të mikëpresin
me gjithë zemër emigrantët e refugjatët. Amerikës Latine i drejtohet ftesa
ta jetojë misionin e përhershëm, për të përballuar sfidat e së sotmes, si varfëria
e dhuna, edhe në kushtet e pluralizmit fetar. Kisha në Azi, edhe pse pakicë,
shpesh e shpërfillur nga shoqëria dhe e persekutuar, inkurajohet e nxitet të mos lëkundet
në fe. Sidomos u shprehet afërsia të krishterëve të Kontinentit që jetojnë në Tokën
e Shenjtë, atje ku lindi, vdiq e u ngjall Jezusi.
Evropa, ndonëse e
përshkuar nga shekullarizmi, nganjëherë edhe agresiv, e plagosur nga pasojat e regjimeve
dhe ideologjive armike të Zotit e të njeriut, ka krijuar një kulturë humanistike,
të aftë për t’i dhënë fytyrë dinjitetit të njeriut dhe përpjekjeve për ndërtimin e
së mirës së përbashkët. Prej këndej, vështirësitë e sotme nuk duhet t’i trembin të
krishterët evropianë, që duhet t’i perceptojnë si sfidë. Në Oqeani, së
fundi, kërkohet të vihet përsëri theksi mbi impenjimin e predikimit të Ungjillit.Mesazhi
mbyllet duke i lëshuar të gjitha impenjimet në dorë të Marisë, Yll i ungjillëzimit
të ri.