அடுத்த ஆண்டிற்குள் எகிப்து நாட்டில் கத்தோலிக்கத் தொலைகாட்சி நிலையம்

அக்.25,2012. அமைதி என்ற பொருள் கொண்ட 'Salam' என்ற பெயரில் எகிப்து நாட்டில் கத்தோலிக்கத் தொலைகாட்சி நிலையம் அடுத்த ஆண்டிற்குள் இயங்க ஆரம்பிக்கும் என்று அறிவிக்கப்பட்டுள்ளது.
Alexandriaவின் அப்போஸ்தலிக்க நிர்வாகி, ஆயர் Adel Zaki இது குறித்து Fides செய்தி நிறுவனத்திற்கு அளித்த பேட்டியொன்றில், எகிப்தில் இயங்கிவரும் ஏழு கத்தோலிக்க ரீதியினரின் ஒப்புதலுடன் இந்தத் தொலைகாட்சி நிலையம் இயங்கும் என்று கூறினார்.
இத்தாலி, ஜெர்மனி, அமெரிக்க ஐக்கிய நாடு ஆகிய நாடுகளில் உள்ள ஆயர் பேரவைகள் வழங்கும் நிதி உதவியுடன் ஆரம்பமாகவிருக்கும் இத்தொலைக்காட்சி நிலையம் உள்நாட்டு கத்தோலிக்கர்களின் ஆதரவுடன் நடைபெறும் என்று எடுத்துரைத்தார்.
காப்டிக் ரீதியினர் மத்தியிலும், ஏனைய கிறிஸ்தவர்கள் மத்தியிலும் ஊடகங்கள் வளர்ந்துள்ள வேளையில், தற்போது நிறுவப்படவிருக்கும் 'Salam' தொலைக்காட்சி நிலையம் கத்தோலிக்கப் பார்வையை எகிப்தில் நிலைநிறுத்தும் என்ற நம்பிக்கையை வெளியிட்டார் ஆயர் Zaki.