«Սուրիոյ Կառավարութիւնը Համաձայն Է Ատհայի Զինադադարին» Կը Յայտարարէ Լախտար Իպրահիմի։
ՄԱԿ-ի եւ Արաբական Լիկայի Սուրիոյ հարցով յատուկ պատուիրակ Լախտար Իպրահիմի յայտարարեց,
որ Սուրիոյ կառավարութիւնը Ատհայի տօնին առիթով հաստատուելիք զինադադարին համաձայն է:
Ան Գահիրէի մէջ լրագրողներուն յայտնեց, որ ընդդիմադիր զինեալ հատուածներու մեծամասնութիւնը
եւս զինադադարը յարգելուն համաձայն է: Սուրիոյ կառավարութիւնը յայտնեց, որ այս հարցով
իր վերջնական պատասխանը պիտի տայ այսօր հրապարակուելիք հաղորդագրութեան մը միջոցով: Իպրահիմի
յայտնեց, որ կը յուսայ վաղը հաստատուելիք զինադադարը օգտագործել «քաղաքական համապարփակ
հոլովոյթի մը մաս կազմող աւելի երկարատեւ եւ ազդու զինադադար մը քննարկելու համար»: Իպրահիմի
չըսաւ, թէ զինադադարը ե՛րբ պիտի սկսի կամ անոր տեւողութիւնը որքա՛ն պիտի ըլլայ: Գալով
Սուրիական ազատ բանակի քաղաքական հարցերով խորհրդական Պասսամ Տատա-ի,ան յայտնեց, որ
«Իպրահիմի զինադադարի հարցով մեզի հետ կապ չհաստատեց եւ ստիպուած չենք անոր յանձնառու
ըլլալ»: Իսկ Սուրիական զինեալ ընդդիմութենէն «Ժապհաթ Նուսրա» կոչուած խմբակը մերժեց
Ատհայի տօնին առիթով Սուրիոյ մէջ զինադադարը: Մինչ այդ, ռուսական բանակի սպայակոյտի
պետ զօր. Նիքոլայ Մաքարով յայտնեց, որ սուրիացի ընդդիմադիրները ուսէ արձակուող հակաօդային
հրթիռային համակարգեր, ներառեալ` ամերիկեան «Սթինկըր»-ներ ստացած են: Հուսկ՝Եգիպտական
օդանաւային ընկերութիւնը յայտարարեց, որ իր օդանաւերուն դէպի Հալէպ թռիչքները կը դադրեցնէ`
քաղաքին մէջ ապահովական կացութեան վատթարացման պատճառով: