Սուրիոյ արտաքին գործոց փոխնախարար Ֆայսալ Մըքտատ ,Լախտար Իպրահիմիի այցելութեան ընթացքին
յոյս յայտնեց, որ շուտով Ատհայի տօնին առիթով զինադադարի հաստատման շուրջ համաձայնութիւն
գոյանայ` շեշտելով, որ «պէտք է այդ մէկը շուտով գոյացնենք»: Ան ըսաւ, որ Իպրահիմիի
«այցելութիւնը շատ տեղին ու յաջող էր, իսկ Իպրահիմիի հետ համագործակցութիւնը` անսահման»`
աւելցնելով, որ «երկուքս ալ կը ջանանք Սուրիոյ, շրջանի եւ աշխարհի վրայ հանդարտութիւն,
ապահովութիւն եւ կայունութիւն հաստատել, ուստի այդ պատճառով Իպրահիմի այս ջանքը կը թափէ`
գործակցաբար առնչակից կողմերուն դադրեցնելու համար բռնարարքներն ու ահաբեկչութիւնը, իսկ
մենք միշտ լաւատես ենք»: Թուրքիոյ փոխ-վարչապետ Ալի Պապաճան յայտնեց, որ Թուրքիա Իպրահիմիի`
Սուրիոյ մէջ Ատհայի տօնին առիթով զինադադար հաստատելու ջանքերուն կը զօրակցի` աւելցնելով,
որ սուրիական ընդդիմութիւնը եւս այդ ջանքերուն կը զօրակցի: Սուրիոյ արտաքին գործոց
նախարարութիւնը յայտարարեց, որ «ֆրանսական նախկին եւ ներկայ կառավարութիւնները Սուրիոյ
մէջ ահաբեկչական զինեալ աւազակախումբերուն տրամադրուած աջակցութեան միջոցով կը շարունակեն
միջազգային օրէնքի բացայայտ մարտահրաւէր ուղղել»: