Ipeshkvijtë latino-amerikanë në Sinod: Kisha t’i pranojë gabimet
Imzot Santiago Jaime Silva Retamales, ipeshkëv-ndihmës i Valparaisos (Kili), sekretar
i Këshillit episkopal latinoamerikan dhe zëdhënës i grupeve të gjuhës spanjolle në
Sinod, duke folur në Asamblenë e ipeshkvijve kushtuar Ungjillëzimit të ri, kërkoi
që Kisha ta shqyrtojë thellë ndërgjegjen e vet. E kjo, pohoi prelati në emër të sivëllezërve
të tij, sepse ne po flasim për ungjillëzimin e ri, jo vetëm pse të tjerët kanë ndryshuar.
Ka arritur çasti të pyesim: “Cilat janë mëkatet e Kishës, që sollën domosdomërinë
e Ungjillëzimit të Ri? Në se ky ungjillëzim quhet, e është i ri, nuk mund të mos pyesim,
pse është i ri? Ç’ka humbur populli i krishterë? Ç’kërkonte nga Kisha, e nuk e gjeti?”.Sipas
prelatit, është themelore të përcaktohen mirë marrëdhëniet e Kishës me botën e sotme.
Në se nuk e bëjmë, vijoi imzot Retamales, do të vijojmë të krijojmë përshtypjen se
jemi institucion, si gjithë të tjerët, e jo bashkësi, e mbledhur rreth Jezu Krishtit,
në të cilën mirëpritet gjithçka njerëzore. Ungjillëzimi i ri, vijoi të shpjegojë sekretari
i Konferencës ipeshkvnore latinoamerikane, duhet të ketë lidhje të ngushtë me kristologjinë
dhe me antropologjinë. Nuk është e mundur ta kryejmë misionin e ungjillëzimit të ri,
pa i hapur shpirtin tonë veprimit të Shpirtit Shenjt dhe hirit të tij. Është Shpirti
ai, që do të na ngjallë gëzimin e harenë, me të cilat duhet të ungjillëzojmë.