Siri: ipeshkvi i Damaskut denoncon masakrën e së dielës. Qëllimi është të terrorizohen
të krishterët
“Cili është mesazhi, që deshën të jepnin me masakrën e programuar të së dielës, pikërisht
në Qytetin e Vjetër, ku përqendrohen kishat e krishtera? Është dhuna pa kuptim, që
troket në portë, për të terrorizuar të krishterët e fundit, edhe ata të vuajtur?”.
Këto pyetje bën kryeipeshkvi maronit i Damaskut, imzot Samir Nassar, i cili reagon
pas bombës, që shpërtheu në zonën e krishterë të kryeqytetit sirian, duke shkaktuar
13 viktima e dhjetra të plagosur. Imzot Nassar përshkruan për agjensinë kishtare
Fides, skenat e panikut në të cilat ka qenë dëshmitar, me prindërit që vraponin të
tmerruar për të kërkuar fëmijët e tyre në shkollat e lagjes, ndërsa sirenat e ambulancave
e theksonin ndjenjën e padurueshme se po përpjetohej një çast apokalipsi. “Disa besimtarë
– tregon ipeshkvi – u ulën në gjunjë, me rruzare në dorë, për t’iu lutur Zojës së
Paqes, para Meshës, e cila filloi me 20 minuta vonesë… Unë kremtova meshën solemne,
të dielën, në orën 18.00, vetëm për 23 vetë. Së bashku u lutëm për viktimat e paradites
dhe për myslimanët, të cilët, në Siri, po përgatiten për të kremtuar festën e “Eid
al Adha”, më 26 tetor, në një atmosferë dhimbjeje e heshtjeje”. Kryeipeshkvi maronit
vë në dukje se lagjja e atentatit Bab-Touma, deri tani, nuk ishte përfshirë nga dhuna,
që i ka vënë zjarrin Sirisë, që nga 15 marsi 2011. Kjo lagje, kujton ai, është simbol
edhe për martiriologun e krishterimit sirian, pasi në këto rrugica, përshkuar nga
Shën Pali Apostull në kohën e kthimit të tij në rrugën e Zotit e të pagëzimit, marrë
në Anani, çdo centimetër katror është vaditur me gjakun e 11 mijë martirëve, në vitin
1860.